減肥經常失敗嘅原因好大部份都要歸咎於過程實在係太過艱辛，節食帶嚟嘅饑餓感令到極多數人無辦法撐過去，忍唔住又開始食返日常份量。其實想瘦就唔一定要餓住個肚嘅，日本近年就好流行食豆渣減肥，食得飽之餘仲可以喺三個月內減12公斤！
「豆渣減肥法」係由一位叫做家村瑪麗嘅模特兒提出嘅，所謂嘅豆渣其實係喺製造豆腐時黃豆殘留落嚟嘅渣。以100克嘅白飯相比，白飯有168大卡，而豆渣就只有111大卡。所以想減肥嘅大家可以將部分白飯替換成豆渣混埋一齊食，除咗可以減少卡路里攝取之外，豆渣當中嘅膳食纖維亦能幫助排便。
另外，豆渣當中含有水份，好容易俾人一種飽足感覺。喺處理用到絞肉嘅料理時亦都可以加入豆渣，咁就可以降低肉類攝取量，食落亦都會更飽肚，令你唔會不自覺地食咗過多嘅份量。
豆渣當中含有豐富鈣質，係豆漿嘅五倍以上，可以幫大家保持骨骼以及牙齒健康。當然亦都唔少得能夠抗老化並具有美肌功效嘅大豆異黃酮，所以喺修身同時你嘅皮膚亦會得益！
Tags: Homita瘦身計
如果你都想分享你嘅美容、時尚、旅行、運動心得，請將投稿文章連同不多於100字個人簡介同埋近照一張，電郵到： editor@homita.com.hk，文章經小編篩選後更有機會刊登喺我哋FB專頁，一經入選我哋會支付相應稿酬，仲唔快啲來投稿？
Author Information
You May Also Like
