如果你曾經幻想被一堆狗狗包圍，Mame & Shiba Café就係你嘅夢中樂園。以豆柴為主題嘅Mame & Shiba Café，大家可以喺度邊歎咖啡，邊同跑嚟跑去嘅豆柴玩樂，享受一個悠閒下午。

Café裝潢以日式簡約系為主，有日本家居嘅感覺，喺榻榻米上同豆柴相處，予人舒適平靜嘅感覺。一打開門，就有一群豆柴前嚟歡迎你，十分熱情。店內豆柴全部嚟自日本，全部活潑好動。

有人會以為，豆柴係未成年嘅柴犬，但事實上豆柴 (又稱為小柴/Mameshiba) 係指體型比較細嘅柴犬，屬於「超小型犬」，體重大約5公斤左右、身高約28至34公分。

柴爸爸(HERO CHAN)於2013年引入豆柴，係香港首間引入豆柴嘅犬舍。犬舍主理人陳先生一直繁殖豆柴，亦經常到日本尋找優秀嘅日本犬。2017年，日本出現首間豆柴Café，並於一年內開咗八間分店。陳先生有見及此，遂計劃於香港開設豆柴Café，佢參考咗日本Café嘅營運模式，喺2019年一月開始試業。

Café原意為「寵物共享」，根據統計，香港每十個家庭中只有一個家庭有足夠能力負擔飼養寵物，所以陳先生希望透過Café令更多無機會養狗嘅家庭體驗同狗仔相處嘅樂趣。此外，負責人發現好少人會喺養狗前去了解照顧事宜，佢期望傳達「先認識，後飼養」嘅觀念，避免出現衝動飼養而致嘅棄養情況。

Mame & Shiba Café佔地750呎，可容納20人。Café提供紙包飲品同日本杯麵，重點不在飲食，而係同豆柴同樂。 喺你進入Café之前，你將被要求除鞋並用消毒劑清潔雙手。不過唔好以為佢哋會乖乖地比你影相，因為豆柴實在太活潑好動啦，基本上長期都會喺店內走嚟走去，超可愛！

明白到大家去豆柴Café，當然希望可以同狗狗有親密接觸，但其實我哋應該留意當中嘅守則，控制情緒，以免嚇怕豆柴，又或者影響到其他人。

為確保豆柴有足夠休息時間，佢哋擁有專屬休息區，想食就吃，想瞓教就瞓；員工另外會安排兩組狗仔輪流換更，只有四個或五個小時嘅上班時間。 所有員工經驗豐富，會留心客人與豆柴嘅遊玩情況，個個客人都玩到樂而忘返！

現場仲有日本引入嘅柴犬精品，如毛公仔，手提袋同銀包，留作紀念。

平日中午12點至晚上9點期間歡迎客人前來，但如果你想喺周末或公眾假期到訪，則需要提前48小時預訂。到店付款的話只收現金，所以要提前準備好足夠嘅錢喺身。網絡預約就需要額外收信用卡手續費！預約半小時收7元手續費，預約一小時收取14元。所以建議大家電話預約或者直接選擇平日下午過去。

豆+柴CAFE(半小時) 包一包飲品 (HKD78) / 豆+柴CAFE(1小時) 包一包飲品 (HKD156)

豆柴真係有一股可愛到爆嘅魔力！快啲去體驗一下豆柴帶比你嘅滿滿幸福感、並同呢班毛茸茸嘅小可愛合照，上傳至Instagram上與親朋好友分享一下~

銅鑼灣店: 銅鑼灣富明街1-5號寶富大樓3樓J室
何文田店(新): 何文田亞皆老街120號地下(利寶大廈)

電話預約：+852 3567 4857

網絡預約：https://cafe.ievent.hk/cbooking-enroll/date/2969

Instagram：https://www.instagram.com/mameshibacafe/

Facebook：https://www.facebook.com/MAMESHIBACAFE/