窮人食家今次去到深圳搵食，眾所周知，東門係平嘢集中地，東門小食街更加係出曬名又平又多嘢食。今次我地2個就嚟到東門美食街睇吓係咪真係咁抵食先！

黃金脆皮香蕉 ￥10

即叫即炸，熱辣辣食，唔會好油都唔會好甜，一碗有4粒小香蕉，好抵食啊！

滋味培根捲餅 ￥10

雖然話係培根捲餅，但入面嘅青瓜係多過煙肉好多好多架！加上佢係無溫度嘅，小編去嘅時候都幾凍，食到呢個都幾令人失望架； 但其實如果唔係咁凍嘅時候食係OK嘅，即叫即整，唔係事先包好先賣比你，係幾可取嘅。

阿拉伯烤肉、火爆魷魚 ￥10／3串

烤肉同魷魚係東門必食小食之一，因為東門有好多新疆人聚集，呢啲串燒係佢地嘅最愛，一定要試啊！十蚊三串可以混搭，望住佢燒都覺得餓啊！

蒜蓉蒸扇貝 ￥10

我地窮人食家就好有良心嘅，小編建議大家唔好喺度食扇貝。小編認為，佢應該叫蒜蓉蒸粉絲，食落去粉絲其實係好好食，但個扇貝肉仲細過我手指尾個指甲！鐘意食粉絲嘅大家，可以去食嘅，但性價比有啲低啦！

Bluescream純手工鮮果雪榚 草莓菠蘿味 ￥10

其實就咁買黎打卡都抵曬啦！但味道就甜咗少少，撇除呢點都幾好食，不過食完好口渴，小編覺得佢係用果醬整嘅雪條而唔係用新鮮果肉製成，不過如果鐘意食甜嘢真係OK㗎，果味都夠重。

下次再同大家去探索吓深圳掃街熱點啦！bye-bye！