好快又到萬聖節，又一個小編大愛嘅節日，可以同朋友扮嘢玩餐飽！但次次都要同朋友左度右度唔知扮乜好；又唔想同成街撞，舊年真係成街都係小丑女啊！想與別不同，自己又冇idea？不如睇吓呢幾個IG搵下靈感啦！
photo via lunafortun
lunafortun好擅長使用眼影做出唔同嘅變化，佢嘅作品多數都係用返平時嘅底妝再上色，面型較長嘅朋友仲可以學埋佢打光影嘅技巧，超立體啊！平時出街都可以用得著。
photo via lunafortun
墨綠色唇膏我諗對大多數香港人都真係只有係萬聖節或者上台先會成立啦！
photo via lunafortun
想係夜色之中突圍而出就要用ＵＶ彩妝，有時未必要塗塗抹抹，就甘線條反而更加特別。
Photo via kimberleymargarita_
如果你偏好華麗得黎又恐怖嘅妝容，可以參考kimberleymargarita_，但要注意返佢嘅妝容都幾高難度架！要有好好嘅暈染技巧，加上佢好喜歡全面打白，一出錯就會好明顯喇，不過小編真係好喜歡佢嘅風格，好華麗好夢幻，邊個話萬聖節一定要黑到底架？
Photo via kimberleymargarita_
閃粉加閃片嘅組合好靚，又唔會整齊到小編密集恐懼症發作！
Photo via kimberleymargarita_
有冇留意到，佢下眼睫毛係用筆畫出黎架！小編自己都幾唔喜歡黐下眼睫毛，係呢啲咁誇張嘅妝容用畫嘅睫毛似乎都係一個唔錯嘅替代方案呢！
Photo via thetrashmask
跟住就到真。恐怖嘅真。難度系列啦！thetrashmask 嘅作品真心係出街會嚇親人，小編如果要仿佢嘅妝可能要１００個鐘先搞得掂！太精細太真啦！如果自問自己化妝同美術基底都有翻咁上吓，可以挑戰吓，Queen of Hallow就係你！
Photo via thetrashmask
骷髏妝其實都算得上基本嘢，但化得咁精細，連頸都留意埋係咪個個都會做？所以話魔鬼真係藏在細節中啊！
Photo via thetrashmask
唔好以為金色就實係陽光燦爛，金黃色加閃粉竟然都可以咁鬼恐怖！
唔知你搵到你嘅靈感未呢？如果未，記住話俾小編知，等小編再介紹更多高超嘅化妝師俾大家！最後希望大家萬聖節一定要注意安全，玩得開心！畢竟第二日仲要返工返學，俾老細/師捉到就唔係咁好啦，Trick or Treat？
