秋天到啦，係時候要出去走走，今次我地去南生圍走走，係經歷咗大火、風災之後，南生圍依然一片翠綠盎然，生命力旺盛得令人佩服！

首先我地係元朗西鐵站A出口出發，向朗和路行，經過西鐵燒烤樂園一路向前行，好快就會見到河就係我地右邊，進入蠔洲路向錦田河行就會到達南生圍路啦，呢度好多人係度慢跑、散步、踩單車，藍天白雲有樹有水，令人覺得好放鬆。

行行下就會見到幾間食肆，大家可以係度食下嘢買下嘢飲，沿路會見到唔少候鳥係度休息、有好多唔同嘅植物，行行下仲有紅樹林，呢度仲有介紹生態嘅板，大家可以係度進一步認識南生圍多樣嘅美。

除咗做運動，沿路向前行會見到一大片空地，呢度有唔少搖控飛機迷會係度放搖控飛機，大家除咗睇記住要小心安全，唔好行得咁出啊！

繼續向前行好快就見到兩排嘅樹，就係大家熟悉嘅打卡地，經歷風災之後，呢度好多樹都被吹得東歪西倒，甚至有大樹被連根拔起，見到咁嘅情景、一根根剛被砍伐嘅樹樁，令人覺得好稀噓；但同時又見到唔少嫩芽已經係倒下嘅地方長出，就係砍落黎嘅木頭附近重新生長，生命力滿滿，呢個依然一片翠綠，無吹倒嘅樹仍然努力向陽而生，心情唔好黎行下，轉下念都唔錯！

再往前走幾步，就係著名嘅婚紗橋，唔少人黎南生圍就係要係度影相，最近呢度仲有有心人係度立咗塊牌，雖然係大自然中有啲突屹，但都睇得出提字人對南生圍嘅喜愛。

呢度仲有一大片芒草，相信再凍少少就有唔少人慕名而來啦！再向前行就係橫水渡，不過今次小編就決定原路折返，好好享受一路嘅微風同陽光。

難易度：★

全程平路，都唔算長，舒服易行。 

打卡度：★★★★

秋日首選，只要有好天氣係度絕對係一個影相多過行路嘅地方。

設施完善度：★★

交通方便，但要係士多先有得去廁所。

最後提提大家郊遊要準備充足；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！ByeBye！