有冇諗過一張紙，一支筆，除咗可以寫字畫野，仲可以做啲咩呢？

相信80、90後嘅朋友們對以下嘅玩意一定唔陌生，童年時嘅回憶，一幕一幕跳入腦海中，天真爛漫嘅歡樂笑聲係耳邊響起，好懷念呢段簡簡單單嘅童年啊！快樂只係源自一張 紙、一支筆！

東南西北

首先係「東南西北」嘅四面八格上分別寫上懲罰/讚美/整估人嘅字句，自由發揮，然後其一人隨意講出方向、數字，例如「西3」，玩家要將「東南西北」套係手上開合3次後，然後要做出寫係西上對應的字句。記得小學果陣同學仔最鍾意寫埋啲整估人嘅字句，諗起都好好笑。

天下太平

一開始雙方先係紙畫上4個格格，然後係格格內分別寫上「天下太平」，之後就用包剪揼去決定，贏左每次可以畫上旗、保護罩或火箭任何一樣，到一定嘅數目時，玩家就可以開始攻擊對方嘅「天下太平」，直至將對方所有嘅防衛都擊破，就贏左喇。

紙青蛙

大家會一齊學摺青蛙，除左跟摺紙書上嘅摺法，有啲同學仔會研究其他摺法令佢可以跳得遠啲，另外仲會幫佢地起個名添，然後比賽睇下邊個嘅青蛙跳得最遠。簡單嘅遊戲過程令大家短暫放下上堂時嘅疲累，嘻嘻哈哈一番後再投入下一課堂。

井字過三關

係紙上畫上一個大井字，然後2人輪流係大井字嘅格上畫上自己嘅符號（X/O), 最先果位以橫、直、斜，將3個符號連成一條線爲贏。

五子棋

2位分別用唔用色嘅筆，輪流係格仔紙上嘅格格畫上圓點，以橫、直、斜畫法，最先可以連到5個點點爲之勝。玩呢個遊戲真係要落足眼力，點點驚心，睇少一點足以輸。

花樣摺紙

一張平平凡凡嘅白紙，加點心思創意，都可以創造出不一樣嘅造型玩意，可愛小白兔，幸福紙鶴、紙飛機、靚靚紙花......親手摺出一份不一樣嘅禮物給你珍惜嘅朋友親人，相信更具意義。