講起植物園,你可能會諗起郊遊、大媽、長者、學校旅行,但廈門呢個植物園,關鍵字卻係仙氣、網紅、打卡熱點、婚紗相。而且恩恩一日都行唔曬!究竟佢有幾大幾靚?等我地一齊睇吓啦!
廈門園林植物園,又名萬石植物公園,建於 1960 年,係一個圍繞萬石岩水庫設計嘅公園。佢係首批國家 4A 級旅遊區,佔地約 26 平方公里,植物園區面積約 2.27 公頃、草坪面積 1.5 公頃、綠地面積 213.6 公頃。除咗八大風景區之外,更設有廿幾個植物區、植物圃同展覽室;全園約有喬灌木180萬棵,栽培咗超過3000種熱帶、亞熱帶植物,就咁睇數字已經係覺得好壯觀。
上次已經同大家介紹咗佢入面嘅仙人掌園,老實講,其實行上去再影埋相、走走看看都無左大半日,而且真係少啲體力都唔得!不過付出同收獲係成正比嘅,已經有不下數十個朋友問恩恩究竟IG張相係邊影XD呵呵呵!呢啲咪虛榮心,真係唔要得啊我:)
除咗仙人掌園,呢度仲有超多地方值得行架(啫係影打呃Like刷存在感⋯⋯);跟我黎啦!首先睇下個地圖先。
首先講咗恩恩去咗嘅地方 ,係入園無幾耐,你會見到一個超大嘅湖,佢就係萬石湖,如果同長輩黎記得識做幫人影張到此一游啦!加爆分㗎!
沿路行去百花廳,你會見到成排嘅簕杜鵑、各式唔同嘅菊花、仲有啲恩恩都叫唔出嘅花。雖然恩恩已經同欣欣去咗長沙灣嘅簕杜鵑隧道,但見到呢度都真係比佢嘅數量震撼到!
去到百花廳,雖然呢度都係幾靚,但如果你唔係好鐘情亭台樓閣,其實可以快速通過。係百花廳附近有2個溫室,就係奇趣植物園,一個就種咗好多食肉植物,真係超級熱!竟然有人耐住熱係度寫生,小女子佩服啊!向另一個溫室進發,呢度比較涼爽, 一盤盤嘅秋海棠係天花板吊落黎,係幾靚㗎!
穿過溫室向下走,穿過一個好多蘭花嘅展館,就到達另一個好好打卡嘅位,呢度無乜人,可以拍出森林嘅感覺。
講係森林,就不得不提呢度嘅熱帶雨林區,比起仙人掌區,呢度更受一對對新人嘅歡迎,全因為呢度嘅「仙氣」,呢度每隔一段時間就會噴出水霧,可以影出一種林中仙景嘅效果,係咪好吸引先。
除咗呢啲園區之外,呢人度仲有竹徑、薔薇園同小桃園,處處都係打卡聖地啊!真係好唔簡單啊!下次我要帶個專用攝影師黎先,影返夠本!
廈門園林植物園(萬石植物園)
地址:福建省廈門市思明區虎園路25號
電話:0086-592-2024785
門票:全票RMB40元/半票RMB20元(早上7:00前入場免費)
web:http://www.xiamenbg.com/
開放時間:夏季05:30-18:30/冬季06:30-18:00