早前恩恩去咗廈門，廈門係一個文青氣息好重嘅地方，我都去扮咗幾日文青。講起文青，就一定會諗到Cafe & Bar，廈門有好多特色Cafe，尤其是大學區附近，就好似今日想同大家介紹嘅Thank you Cafe。

我地係去食晚餐，店入面燈光昏暗，好有小酒吧嘅感覺。客人可以選擇坐係吧檯或者餐桌，張張都唔一樣，有好似返學時代坐嘅小椅子，亦都有慵懶嘅大梳化，雖然聽上去好似好唔夾，但放埋一齊又不覺突兀。

食物都姆多選擇，今次我地揀咗和牛溫泉蛋飯同香烤豬肉碟頭飯，仲叫咗個Tiramisu；飲品方面叫咗牛油果薄荷酸奶同拿鐵。

和牛溫泉蛋飯好Juicy，行到攰一攰就岩晒，補充精力再出發！

香烤豬肉碟頭飯口味比較重，對恩恩黎講太咸，不過肉質軟熟，隋碟附上一小碗醋，幾多東南亞風味。

Tiramisu真心好好食，咖啡味好香，微微濕潤嘅蛋糕同忌廉緊密貼合，好耐都冇食過咁好食嘅Tiramisu啦！

呢度所有酸奶都加咗薄荷，一開始唔係好習慣，但越飲越好味，尤其是叫咗重口熱食，可以清清味蕾。

拿鐵不過不失，奶味幾香，用玻璃杯上，但如果你想飲熱辣辣嘅咖啡可能要揀其他啦，因為佢係暖嘅。

地址：廈門市思明區大學路 211 號 13-14 號（近廈大醫學院）

電話：592 2082609

開放時間 ：11：30 - 00：00 (星期二休息)