今次我地就想同大家去龍鼓灘，龍鼓灘係除咗離島之外香港最西面嘅海灘，所以特別適合黎睇日落。除咗漫步沙灘睇日落之外，夏天仲可以睇到天空之鏡同中華白海豚，重點係人比較少，過黎拍下拖好好Feel架！

首先可以係西鐵屯門站C出口嘅巴士站搭K52號巴士，係沙埔崗177號落車。一落車就到咗沙灘啦！係呢條呢條長長嘅沙灘散步好舒服、好浪漫架！回頭望可以見到龍鼓灘發電廠，天晴嘅時候仲可以遠眺澳門新葡京、珠海市一帶，景觀好開揚。

行過沙灘，會經過村公所士多同燒烤場，之後就會見到中華白海豚瞭望台。沿樓梯拾級而上，風景都越黎越靚，上到去會有一座涼亭，再上去就係瞭望台，呢度風景好開揚，天氣熱嘅時候仲可以見到中華白海豚添！

瞭望台隔離有一條小徑，通過小徑會上到隔離嘅小山崗，不過呢度有唔少風水地，介意就唔好過去，上到去小山崗見到嘅風景會更加廣闊，呢度有幾舊大石，坐上去睇風景好舒服架！仲有人係度畫咗個心心添！

難易度：⭐

除咗去上山崗要小心砂石跣腳，基本上都係鋪好嘅路。

打卡度：⭐⭐⭐

睇日落一流，夏天仲可以睇到中華白海豚同天空之鏡添！

設施完善度：⭐⭐⭐⭐

指示好清晰，有士多有廁所，睇完日落仲可以落返去BBQ。

最後提提大家行山要準備充足，量力而行；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！拜拜！