今日我地想同大家去行藍地水塘,同大多教你行屯門徑嘅文章唔同,今次係真‧輕鬆遊,比起上次由川龍行去荃灣更加簡單!皆因小編身邊嘅朋友個個都唔願郁,就算想行又冇做開運動,安全起見,小編都係推薦多啲新手輕鬆路線比大家,其實就算冇身水身汗行山,係香港一樣都可以見到美景架!
首先可以搭西鐵去兆康站,係F出口出。之後向嶺南大學行,經過嶺南大學繼續向前行,轉入富地路,向虎地上村方向行,經過虎地上村嘅信箱再向前走,可以慢慢行睇下花,一路沿路行入去好快就到虎地燒烤場。
如果你地係由屯門經彩虹欄杆路線行過黎,就會係呢度出返黎啦,不過屯門行過黎有好多梯級,要有好多體力先行到。繼續沿燒烤場出面車路向前行,會經過一個分岔路,其實兩邊目的地係一樣嘅,落樓梯就會快啲乾淨,行泥地就有行山Feel啲,不過會經過一座墳墓,大家可以自行選擇。再向下行就見到水塘啦!
藍地水塘,又名老虎坑水塘或藍地灌溉水塘,屬於灌溉水塘,同洪水坑水塘相距不足一公里。水塘的水最終流入屯門河並匯入青山灣。藍地水塘呈漏斗形,面積17,000平方米,儲水量11.6萬立方米,水塘最深處達20米。呢度環境清幽,附近設有郊遊設施,亦係屯門徑第二段終點。
經過水壩之後轉左,沿路就可以出返去藍地村,一路見到唔少農地,估唔到地方細細都有人種菜。仲有見到呢張搵貓嘅告示,希望主人可以搵得返佢隻愛貓啦!好快我地就出返藍地村,呢度有間腸粉好好食架,行完山食個小食永遠都係最開心嘅!村外有巴士出返港島同九龍,附近亦有輕鐵站,非常方便!
難易度:★
一個鐘內可以行完!再懶啲搭的士入燒烤場先行落去都得!
打卡度:★★★
香港嘅水塘各有特色,小編有鋪癮想集郵☺
設施完善度:★★★★★
係短短嘅路程入面途經燒烤場,附近都有洗手間同垃圾筒,藍地有唔少野食。
呢條路線可以睇到碧緑嘅水塘,小編去嘅時候其實天氣唔算晴朗,但因為水塘嘅顏色本身都粉粉地,反而覺得好有仙氣,好值得一行架!如果你嫌呢條路線太簡單,有機會小編再同大家行埋去上塘放下電啦!今次嘅郊遊習作係甘多,我地下次見!