今次深圳遊樂團想同大家去食椰子雞，雖然香港都有得食，但小編個人認為內地呢一類嘅火鍋會做得更好食，性價比都比香港高，所以不時都會上去打下邊爐，今次我地就去到喬木四季嘅KK ONE分店探店。

店內裝修風格行東南亞風，成個熱帶叢林咁，一張張環形藤椅、一個個泰式抱枕、一座座精緻的木雕、仲有棕櫚葉屋簷，一進店就覺得有掠過芭蕉葉嘅風迎面撫來，好似置身於東南亞小島上面咁啊！

海南椰子雞煲已經出名咗好幾百年，清甜嘅椰青湯底惹來一班忠實粉絲，其實佢嘅製作工藝都好大同小異，椰子水鍋底、2.5斤文昌雞、竹笙、小馬蹄、椰肉，都係椰子雞嘅標配，而喬木四季椰子雞仲有好多唔同口味比大家選擇，不過小編都係鍾情傳統，叫咗半隻竹笙椰子雞。

食椰子雞就最緊要飲湯，係打邊爐之前食晒啲雞肉同飲夠湯先，無味精又清甜嘅雞湯，唔止好飲仲好健康！有時帶埋長輩小朋友黎食都係一個好選擇。

呢度都有多菜品比大家選擇，小編就極推薦冰豆腐，識食一定係揀會索湯嘅配菜。

牛肉小編叫咗最普通等級，個人覺得都好夠做，因為本身個湯底好甜，就算普通牛肉都好好食。

不過佢嘅醬料就比較大路，青檸、辣椒同蒜粒，加埋豉油，蒜粒應該一早切定，有啲乾身。

其實食椰子雞，好多人都會叫煲仔飯，喬木四季仲將煲仔飯分了3個等級：一級、超級、霸王級。不過小編得2人行就冇叫到，下次有機會小編都試下佢個霸王級煲仔飯有幾犀利先。

喬木四季椰子雞 KK ONE分店

地址： 濱河大道9289號京基濱河時代北區3層306

電話： 0755-82517517