大家都知道小編成日返深圳玩，繼初代、Tony Flower之後，小編又去咗奈雪之茶嘅新分店，位置就係新開嘅Muji Hotel附近，超方便！

其實如果有去開深圳好多人都知道奈雪之茶啦，同港人熟悉嘅喜茶一樣，都係以深受女性喜愛嘅裝潢同少女系茶品同輕食作主打嘅排隊店，但其實奈雪之茶仲係一間麵包鋪黎架！

奈雪之茶嘅麵包係歐式軟包，比起日式軟包會比較清淡，因為佢地主張少油少糖少鹽嘅制作，所以成品會貼近食材嘅原味。

鐘意食甜嘅朋友可以試下呢個奶酪芋頭山，因為餡料入面加咗蜜糖，但又唔會搶咗芋頭本身嘅甜味，軟包上仲有粒粒粟米，足料又好食！

想清啲可以揀呢個草莓魔法棒，其實就甘睇個樣都已經好吸引。佢嘅士多啤梨忌廉唔會好甜，加上士多啤梨自然嘅酸酸甜甜，食落無乜負擔。而且賣相極出眾，五粒士多啤梨排係軟包上面，打卡必點！

店內仲有售賣蛋糕，一個個樣貌精緻，唔少人都會叫一件蛋糕去配茶飲。

小編就叫咗個草莓嘟嘟，粉粉嫩嫩嘅士多啤梨外型討好，本身以為會好甜，但出奇地唔會，外層係薄薄嘅士多啤梨朱古力，入面係微酸嘅芝士蛋糕，小編覺得好好食，但直男攝哥哥食左一啖就唔食啦，比大家參考返。

而佢地最受人喜愛嘅茶品黎自阿里山，仲係得獎名茶黎架！而網紅系列當然唔少得芝士奶蓋系列同霸氣系列。

奈雪之茶仲會不時推出季節限定產品，全部都好睇又好食架！

今次小編就試咗佢嘅新品霸氣芝士覆盆子，使用法國覆莓搭配冷泡茶，加上濃郁嘅芝士奶蓋，好好飲！而紅白色嘅外表寓意紅紅火火，覆莓寓意甜甜蜜蜜，好好意頭！而小編平時最愛嘅呢就係芝士阿里山初露啦，因為茶味好香，佢嘅茶仲幾次拎咗台灣阿里山同鹿谷茶鄉比賽嘅頭等獎，一啖芝士一啖清茶真係好過癮。不過芝士同茶唔好亂咁撈勻飲，小編真心唔推薦咁做，因為芝士帶有咸味，唔係個個人都接受得到，第一次可以飲淨少少先撈落去，覺得接受到下次先好撈。

係度買咗軟包之後就可以拎去Counter切包，如果你要拎走都係喺度打包！呢度好貼心地提供手套方便大家進食；如果拎走都會幫你切成合適嘅大細先打包放入紙袋，順帶一提呢度嘅紙袋好靚架！

更加Sweet嘅係只要你買佢嘅蛋糕，食完之後係可以拎走支玫瑰金小叉，又有紀念性又實用！

今次去呢間分店因為係新起嘅深業上城入面，商場內嘅鋪頭多數都未開張，仲未有好多人知，所以都仲搵到位，大家趁未有咁多人好快啲去啦！

地址：深圳市福田區蓮花街道皇崗路5001深業上城（南區）商場裙樓B1層M11號商舖
電話：0755-23949842
營業時間：週一至週日10:00 am-10:30pm