新一年開始,唔知大家有冇去聽下新年運程呢?好多人都被建議要出遊,而海島國家一直都係香港人最愛之一,去玩想影靚相,除咗需要靚機靚衫,甫士都係好重要,小編就集合咗一啲影相貼士比大家,跟住影你都可以做KOL!
訓係沙灘上影相個人會睇上去比較修長,而且仲好性感添!無論你有冇著泳衣,見到沙灘訓上去就岩啦,打側訓個人會更顯瘦!
如果怕污糟唔想訓沙灘,可以訓吊床,更加Chill!
如果你對自己身材好有自信,不妨試下跪/趴姿勢,真係超級性感啊!
如果你想坐,最好就屈起條腿,身體曲線會明顯啲,如果有肚仔都可以起到修飾作用。
企就要拗出曲線,修腰嘅線條越突出,你嘅曲線就越靚。又或者盡可能拉長全身,大Show長腿。
最直接嘅做法就係將自己浸落水,半身浸入去可以直接遮到下半身,梨形身材嘅女仔一定要記底啦!而成個人浸落水(浮潛/潛水)除咗最大地曬出自己去海島玩之外,最好嘅一點就係唔洗化妝!啱曬好似小編呢啲懶人。
一唔係就直接搵靚景做背多芬,又或者整返個遠鏡低頭側拍,都係一個唔洗化妝嘅打卡好方法。
去到海島影相,加少少道具就更加有Feel啦!例如太陽眼鏡,想更加有熱帶嘅感覺就梗係要著埋呢幾年大熱嘅Off Shoulder!仲可以遮住ByeBye肉添!
長裙永遠係海島好朋友,仙氣飄飄仲可以幫你慳返唔少防曬!
玩水打卡點可以無咗水泡呢?坐係大大個水泡中間,即刻青春無敵!加埋杯靚靚Cocktail,呃Like無難度啊!
另一樣神器就係衝浪板,如果話水泡係青春無敵女神Feel,衝浪板就係活力四射運動健康代表,就算你唔識衝浪,就咁影返張相都令人覺得你健康魅力滿分!
當然,你嘅朋友同面上嘅笑容永遠都係最好嘅畫面!有咩比同好閏蜜去渡假更令人羨慕呢?
係最後小編想講,其實有自信嘅女仔就最天然、最靚,Less is more,拎出你嘅自信拋棄你嘅束縛啦!(不過小編唔敢XD)希望呢篇文可以比到大家一啲參考啦!