今次窮人食家又去咗旺角，老老實實，雖然小編自己都好鐘意去旺角掃街，但係要$50食2人份，小編又真係無試過，今次其實唔算食得飽，食咗3樣野食，一齊睇下我地食咗D乜啦！

糍到大王

香蕉薄餅　＄１８

香蕉同朱古力一直都係好朋友，所以其實本身都預咗佢會好好食。叔叔即叫即整，冬天食到熱辣辣嘅甜品真係好開心。值得一讚嘅係佢嘅薄餅唔會好油，咸咸地反而更突出香蕉同朱古力嘅甜味，仲細心甘幫我地碎上，唔會食得好狼狽。

地址：旺角旺角道93-99號華懋王子大廈地下C3號鋪

和藏桂林夜市

生腸＄１２

其實小編本身唔係好喜歡食生腸，但鋪頭姐姐大力推薦，小編就試下。果然係幾好食，好入味，味道偏甜，加上芥辣好清爽，可以一試。呢度仲有好多好吸引嘅小食賣，但又未去到肥姐咁要排晒長龍，推薦！

地址： 旺角登打士街55號

一豆花

小編同攝影哥哥都好鐘意食豆腐花，呢間豆腐花小編食過熱豆花幾次，今次試下凍嘅芒果豆腐花，以凍食黎講豆腐花都幾滑，但芒果太大浸糖水味，扣分！小編都係推薦大家食熱豆花，真心唔錯架，仲平Ｄ添！

＄２０

地址： 旺角弼街80-84號百寶大廈

其實旺角食野都冇乜伏，但就比較難搵到平、大份夾特別囉。不過今次食嘅３間都算非常可取，有機會大家都可以去試下。今次窮人食家係咁多，你地又有咩小食推薦呢？話比小編知，等我又去試吓！