武漢肺炎疫情下，為咗防疫，市民日日外出都需要長期配戴口罩，令唔少人陷入「皮膚災難」！長時間戴口罩會令肌膚更易出現粉刺、暗瘡、敏感等皮膚問題，情況持續嘅話可能隨時會有爛面危機！要對付呢啲戴口罩嘅皮膚後遺症，我哋就更需要注重臉部肌膚嘅日常護理，就等小編講下9大招數，令你喺預防疾病嘅同時都可以保持好膚質啦～

「口罩暗瘡」成因

唔同類型嘅口罩都有機會引發暗瘡，但一般而言，「越焗就越大機會爆瘡」，例如N95口罩會比普通外科口罩更易引發暗瘡。戴上口罩時，口罩會與皮膚形成密閉空間，溫度上升會令血管擴張，並增加油脂分泌，增加毛孔閉塞嘅機會。而且呼吸產生嘅水蒸氣亦會被困其中，所以口罩內嘅溫度同濕度都會相對較高，形成有利細菌滋生嘅環境。綜合以上情況，所以長期戴口罩就會容易引發粉刺同暗瘡等皮膚問題，尤其係本身屬於油性皮膚嘅人，由於皮脂腺比一般人活躍，就有更加高嘅機率生暗瘡啦～

九招抗敏護膚大法

1：戴口罩前做好保濕，忌用質感厚重嘅護膚品

正值春天潮濕季節，加上需要全日戴上口罩，應避免使用質感厚重或者過度滋潤嘅護膚品，護膚品宜挑選清爽、舒緩、乾淨為主，護膚步驟宜比平時更清爽一度。例如你平時如果用面霜嘅話，不妨改用清爽型乳霜；如果你平時已經用緊乳霜，咁改用水質精華乳液就夠。

2. 盡量唔好化底妝，更避免搽防曬

原本戴口罩已經會令皮膚變得敏感，如果再混合埋化妝品，唔單止會整污糟口罩，仲有機會令皮膚問題惡化，嚴重嘅話仲會毛囊發炎！喺疫症期間，唯有呼籲各位貪靚嘅女生忍下手，頂多畫下眉，或者化個簡單嘅眼妝，令自己望落去精神啲就夠啦。

口罩覆蓋到嘅區域亦唔好再搽防曬啦！因為防曬嘅質地偏油，使用後，會較易喺口鼻位置產生粉刺問題。其實被口罩覆蓋嘅肌膚根本曬唔到太陽，大家搽防曬嘅時候記住避開口罩覆蓋嘅肌膚，廢時增加肌膚負擔啦～

3. 定期印走油脂 ＋ 4小時更換口罩 

戴口罩導致皮膚變差嘅最大原因係口罩內嘅濕氣，所以喺雙手清潔嘅情況下，每隔一至兩小時，可以喺無人又空曠嘅地方打開口罩一下，簡單用紙巾印走鼻翼、下巴等位置嘅油脂污垢；如果你係敏感肌或油性肌膚，就更加要確保每4小時就要更換一次口罩，防止細菌滋生，減低生暗瘡或皮膚過敏嘅機會。

坊間有人將面油紙或紙巾放喺口罩內，以減少口罩同面部嘅摩擦、吸取面油， 但其實呢個做法係大錯特錯㗎！因為咁樣會令口罩同皮膚之間造成一定距離， 唔夠貼服就會減低咗口罩嘅保護功用。另外，長期放置吸油紙於面上只會刺激皮膚分泌更多油脂，積聚更多細菌喺口罩同面頰之間！所以大家千祈唔好咁做呀～

4. 戴口罩時請盡量少說話

戴口罩時，原本口罩裡嘅水份就不易被揮發，若加上說話時所噴出嘅口水，就更大幅咁增加口罩內嘅濕度、溫度、同細菌數。試想像我哋成日都戴著呢個滿佈細菌嘅口罩，而呢啲細菌又貼合住我哋肌膚嘅話，皮膚想唔發炎都難啦！所以，建議大家「想少發炎，盡量少發言」。

5. 避免戴口罩做運動

外出嘅時候要注意，避免戴口罩做一啲可能導致出汗嘅運動，例如運動健身。因為當汗水與肌膚接觸，會容易產生過敏，同時增加口罩內皮膚發炎嘅風險，所以近排都係乖乖地留喺屋企做運動算啦！

6. 回家後即時潔面

為咗防止細菌有機可乖，回家除底口罩洗手後就要第一時間進行潔面。但不宜過度清潔或去角質，因為咁反而會破壞咗肌膚嘅天然屏障。選用溫和嘅潔面產品，清潔臉部一整日積累嘅油脂同灰塵即可。亦可間中敷下深層清潔面膜嚟‎徹底潔淨肌膚底層，清除黑頭暗粒，同埋毛孔內嘅油脂污垢及死皮。

7. 潔面後緊記保濕

徹底潔淨肌膚，可以令後續搽嘅保濕產品更易被吸收。底層肌膚得到充足水分滋潤，皮膚自然就光澤水嫩～要維持臉部水分充足，同時唔會太黏膩，為皮膚造成太大負擔，就要選擇有高保濕度但質地清爽易吸收嘅保濕產品，維持翻肌膚嘅水油平衡，令佢回復健康良好狀態。

8. 抗痘護理

皮膚長時間處於焗促嘅環境下，油脂分泌旺盛，自然更易阻塞毛孔，大大增加生粉刺同暗瘡嘅機會。如果真係咁不幸生咗痘痘，就要喺患處塗上抗痘產品，咁樣會有助暢通毛孔，令粉刺、黑頭同暗瘡快啲凋謝，避免感染到周遭肌膚。

長期戴口罩嘅日子恐怕仲要持續一段時間，處理暗瘡首要重點係「唔好擠」，因為擠暗瘡只能清除表面嘅膿頭，但無助解決皮膚深層嘅發炎問題，更有微絲血管受壓破裂嘅風險；而且雙手帶有細菌，擠暗瘡時造成嘅傷口可能會受感染，隨時令發炎變得更嚴重！

9. 停用過敏口罩

戴口罩時皮膚同口罩不斷摩擦，會出現泛紅、痕癢、發熱等過敏問題，尤其對敏感肌同濕疹人士嚟講，情況就更為嚴重。如果真係有呢種情況，可能嗰款口罩嘅纖維材質並唔適合你嘅皮膚。患者可更換其他品牌低致敏、透氣度高嘅口罩。亦應選擇舒敏、成分天然無添加嘅護膚品，為皮膚即時急救。當然，若敏感情況持續緊記要求醫！

總括而言，除咗勤洗手之餘，大家亦唔好忘記做足保護皮膚嘅措施。希望大家喺除底口罩後仍可擁有靚靚皮膚啦！