一提起春天，相信大家都會諗起百花齊放嘅花園，唔少品牌亦會襯機推出以鮮花爲主題嘅粉嫩彩妝系列，韓國彩妝品牌Dear Dahila近日推出「秘密花園」系列，推出一系列花朵色澤嘅彩妝品，搭配品牌出名嘅少女粉色雲石紋包裝，誓要俘虜一眾女生嘅心！
不得不提，系列嘅主打產品–9色眼影胭脂盤實在太靚啦，夢幻粉嫩嘅配色、高貴淡雅嘅雲石花紋包裝、一盤兩用百搭實用，美妝控今個春季一定要入手一盤！9色彩妝盤一共有三個組合，分別有以奶茶色調主嘅Tea Party、橘紅色調嘅Flower Bed 同粉紫色調嘅Spring Bouquet～每盤都含有珠光、大亮片、霧面等唔同質感嘅眼影，一盒在手就能輕鬆化出小清新春妝啦〜
小編最鍾意嗰盤係橘紅色調嘅，佢有齊多款春天流行顏色，例如化花瓣妝必備嘅粉橘色、蜜桃色，同時又具備日常妝容常用嘅大地色系，每格顏色都超實用！而當中嘅亮片色，更加係成個彩妝盤嘅亮點，當中有兩格好似雲石花紋嘅雙色閃片實在太靚〜就算買咗都完全唔捨得用！而盤入面嘅胭脂亦係能帶出自然好氣息嘅淡橘色～
另一盤Tea Party雖然無Flower Bed咁少女、甜美，但奶茶色調最近喺韓國都好流行，皆因奶茶色溫柔又顯白，雖然佢無另外兩盤咁搶眼，但卻更耐看，更適合搭配日常妝容，輕鬆化出氣質女神高質感韓妝！
而粉紫色調嘅Spring Bouquet，有最近大熱嘅香芋紫色，淡淡嘅香芋色其實並唔誇張，上眼後就似冷調嘅粉色，絕對唔難Carry，反而會令眼妝更加獨特，好似春天先盛放嘅薰衣草咁，充滿浪漫春日氣息！
除咗9色眼影胭脂盤之外，呢個系列嘅唇膏都好吸引，一共有三隻色，分別係蜜柑、乾燥玫瑰同粉百合色，而唇膏名更以Olivia、Victoria同Audrey呢三個女生姓名命名，顯得高貴優雅。唇膏質感亮澤幼滑，搽上嘴順滑，唔會卡住乾紋，即使素顏用，都非常自然，能夠提升氣息～
DEAR DAHLIA 秘密花園系列另外仲有兩色胭脂、閃亮唇彩、粉餅、同粉底Cushion等，同樣款款都擁有超靚配色同包裝，有興趣嘅不妨去下官網睇睇〜
