呢排肺炎肆虐,唔少打工仔都要喺屋企做嘢,但你知啦,屋企咁舒服,唔覺意又瞓多咗,唔覺意又走咗去做其他嘢⋯⋯搞到拖延症越嚟越嚴重喇!為咗改善呢個問題,小編都有研究下有咩方法可以提升自己嘅行動力同效率,一於同大家分享下啦!
1. 用5分鐘踏出第一步
好多時一件事冇進展,都係因為我哋一直都唔踏出第一步,例如會因為覺得件事有難度、好複雜,或者係認為自己仲有好多時間可以開始⋯⋯但其實只要攞出短短嘅5分鐘嘗試開始做,就會發現唔難進行落去,「萬事起頭難」果然係講得冇錯㗎,有一個好嘅開始,就等於成功咗一半!
2. 分解任務
啱啱都提到,通常我哋唔想開始係因為覺得件事好難好複雜,但只要我哋識得將一個完整嘅任務分成細份,再逐個逐個完成呢啲細任務,就唔會覺得成件事好困難,而且仲可以保持一個良好進度添。
3. 改變工作環境
盡可能地改變你嘅工作環境,例如你見到床就好想瞓覺,咁就遠離你張床;如果你好易分心,就擺開啲會令你分心嘅物件,只留一啲你工作會用到嘅嘢,如果唔係你會連隔離枝hand cream嘅成份表都覺得好好睇㗎。
4. 改變心態
有一種人成日遲遲唔開始做一件事係因為佢有完美主義,對自己要求好高,所以會俾自己好大壓力期望自己做一樣完美嘅成品。但咁係唔得㗎!我哋要先降低自己嘅期望,要求自己做一件「冇咁高質」嘅成品出嚟先,然後再慢慢修改。從來一件出色嘅成品都係靠多次嘅修改先變得完美,真係冇乜幾可一整完就完美~呢個方法可以確保進度,咁就唔洗擔心自己係咁拖拖到咩都未做啦。
5. 使用「無壓力」動詞
呢個方法小編覺得幾得意,就係喺schedule度寫低我哋要做嘅事項時,用「開始」、「繼續」呢啲字眼,咁樣會令我哋覺得冇一種強調「一定要完成」嘅壓迫感,等我哋可以喺冇咁大壓力嘅情況底下展開工作。即使冇完成工作都好,任何進度都係一種進展,總好過乜都冇做過啊~