武漢肺炎爆發後，除咗疫情新聞之外，仲出現咗唔少搶購潮，例如大家都搶嘅口罩，酒精消毒用品，紙巾、米、清潔用品等......雖然依家日日都有一堆令人壓抑嘅消息，但仍然有啲趣聞可以比我哋輕鬆一下，就好似網路上瘋傳嘅「口罩貓」！一隻喺微博上嘅貓咪，就因為戴咗一個口罩出街而瞬間爆紅～

武漢肺炎疫情持，唔單止全民戴上口罩抗疫，更有人為愛寵戴上口罩，以防萬一。近日武漢肺炎肆虐各國，平日無人問津嘅口罩竟然成為保命必需品，無論喺邊一個國家都超級搶手，一罩難求，有錢都未必買到！

而喺呢張喺微博流傳嘅相中可以見到，一位長髮披肩、配戴口罩嘅女仔買餸時，用繩拖住寵物貓散步，仔細啲睇，隻貓咪原來都戴咗口罩，仲喺眼睛位置剪開咗兩個洞方便睇路。

竟然連貓咪都戴上千金難買嘅口罩，大部分網友紛紛笑指呢個根本係炫富嘅行為：「太奢侈啦！我都無得戴，因為買唔到口罩......」、「大戶人家嘅貓，就有口罩戴！」。其他網友就留言表示：「莫名地好笑」、「我都想將我屋企嘅主子搞成咁，哈哈！」、「佢主人一定好愛佢～」、「好可愛好溫暖！感覺主人係真心希望小貓咪健康～」。

呢張可愛搞笑嘅相一擺上網分享後即刻被瘋傳，仲紅到去日本！日本手作神人meetissai「めーちっさい」更仿照相中貓咪，整咗個還原度極高嘅模型，連藍色口罩嘅質感都還原得非常細緻！唔少網民表示支持「口罩貓」模型以扭蛋形式推出，量產出現喺扭蛋機，紛紛興奮表示「速度太快啦！」、「想買一隻～」、「兩盒Thx！」、「笑到控制唔到」！

作る予定じゃなかったんですけどね… pic.twitter.com/6WGQAy8GXr

— めーちっさい (@meetissai) February 11, 2020

其實呢位手作神人嘅作品，相信大家都唔陌生，meetissai擅長用黏土還原出各種動物搞笑圖，當中包括早前超Hit嘅勾拳柴犬、「尷尬又不失禮貌的微笑貓」等，令佢人氣急升，依家喺Twitter已擁有超過12萬Fans～

最後提提大家，目前並未有寵物染上武漢肺炎嘅案例，幫寵物戴口罩防護其實無太大作用，大家唔洗去爭住模仿「口罩貓」啦～