市面上有唔少音樂平台，Youtube係其中之一個。但係用Youtube聽歌嘅壞處，就係唔可以鎖屏聽歌，始終會做成不便。不過大家依家唔洗煩啦，因為Youtube Music喺香港上架啦。

11 月 6 日凌晨，Google 宣布於香港推出全新音樂串流服務「YouTube Music」！前者主打音樂，分為免費和付費兩種，以下一一說明帶大家快速了解。

首先免費版 YouTube Music，可以話係音樂串流版 YouTube，唔洗付費就能收聽含廣告穿插嘅樂曲、欣賞音樂影片，分類項目包含官方專輯、單曲、混音、現場演出、翻唱、演出者電台等等 YouTube 先有嘅豐富音樂內容。而免費版有幾個限制：1. 音樂唔可以鎖屏後於背景播放；2. 有廣告；3. 唔可以下載歌曲離線播放。

至於付費版 YouTube Music Premium 則完全無廣告干擾，而且支援下載離線收聽、一鍵切換音樂或影片模式，仲可以使用背景播放模式，即使鎖屏都繼續播。另外亦能以 Google 智慧音箱 Google Home 或年底正式上市嘅 Nest Mini、Chromecast Audio 等播放。 

作為 Google 產品，AI 人工智能當然唔少得，所以 YouTube Music 標榜嘅另一特色就係「智能音樂推介」。系統會根據你喜好、曾經播放嘅音樂去推薦更多歌曲，而且仲有智能搜尋器，單靠一句歌詞就可以幫你快速找到所要歌曲。

同 Apple Music 一樣，YouTube Music 都有免費試用期，但就只得一個月，比起 Apple Music 嘅三個月少。用戶可免費試用YouTube Music Premium 付費會員服務一個月，其後可以每月58元訂閱（iOS版為78元），而家庭計劃則88元（iOS版為118元）。家庭計劃每月可連結5個家庭成員（13歲以上）共享使用。此外，用戶亦可隨時取消訂閱Premium服務。

精明嘅消費者一定留意到iOS版本比Adroid版本貴。唔公平？原來有秘技慳錢！因為現時無論 Android、iOS、Web 等版本都係使用同一個帳戶登入。即係話，大家可以透過 Web 或 Android 訂閱，然後就可以用同一個帳戶喺 iOS 平台上使用。

YouTube Music 應用程式現已於Android  Play 商店及 iOS  App Store可供下載使用。Google早前表示，Android手機未來將預設YouTube Music，取代Play Music。