趁住放假，約埋朋友去踩下單車都係一個好選擇。今日小編想同大家推薦一條單車路線，由天水圍出發入尖鼻咀，再去埋拉姆薩爾濕地返先天水圍，路程只有大約6KM，短短2個鐘就可以完成，全程風景都好靚，大家可以好好放鬆一下。

首先可以係天水圍市區租單車，經天月路向流浮山水警碼頭方向踩，會經過幸福山莊，幸福山莊係個釣蝦場，即釣即燒，有興趣可以黎玩架！經過幸福山莊繼續到盡頭轉右進入深灣路，一路沿深灣路踩，會經過沙橋村海旁，沙橋村世代養蠔，入到去會見到片地蠔殼，好壯觀！唔少攝影發燒友會入黎影日落架！大家如果入去都可以順便去埋洗手間。繼續沿深灣路踩，都會有一個公廁，冇入沙橋村海旁嘅朋友可以係度去洗手間。繼續踩去后海灣，望過對面就係深圳啦！附近有條短短嘅樓梯上唐夏寮，大家可以上去眺望米埔嘅景色，之後繼續踩，會有條分岔路，轉入去之後一路向天水圍方向踩就會去返天月路，沿途欣賞拉姆蕯爾濕地嘅風景，除咗一片片紅樹林，仲會有好多侯鳥飛過；另一個選擇可以經邊境路踩過豐樂園，呢邊有好多漁排，邊踩邊欣賞沿途風光，然後再沿福順街踩就可以返返去天水圍。

呢度路線雖然短，但沿途都有幾多大小斜坡，尤其是一開始同收尾都有大斜坡，而且都會踩上馬路，所以唔建議新手自己去，最好叫幾個朋友，確保有能力踩晒全程先好去啊！