每年二月盛放嘅鐘花櫻桃同梅花，今年提早盛開。今日我地就想同大家去嘉道理農場賞花啦！成片嘅鐘花櫻桃林，真係好壯觀呢！

首先可以去大埔或者元朗搭64K，係嘉道理農場站落車。入場費係每人30蚊，比咗錢就可以入場啦！

大家可以睇岩時間搭接駁巴士上山賞花，但我地就選擇慢慢行上山，順便睇下仲有咩其他野睇。雖然其實網站上都有地圖睇，但小編呢啲路痴都係用Google Map導航。

入咗園之後上樓梯，向翟克誠野生動物護理中心行，如果有時間可以行入去生機園，入面種咗好多花，雖然係冬天，但好多花都開咗，吸引唔少人黎影相。

之後出返黎就可以行入翟克誠野生動物護理中心，入面有黃麂、野豬、蝙蝠等等動物，但因為啲動物都係因為受傷或者要被保護先送入黎，多數都係得一隻，好孤獨啊????

穿過野生動物護理中心，沿梯級向上行，會見到雀鳥區。呢度啲雀鳥比較活躍，大家得閒要去探下佢地啊！

再向上走，會見到前面有園景步道，一旁都有桌椅比大家休息一陣，想打卡呢度都好有Feel架！

離開步道，會見到一排鷹籠，呢度嘅鷹雖然好多都受過傷、甚至無法飛行，但佢地嘅眼神都仲係好銳利啊！

睇完小動物之後，可以沿之字型車路繼續行上山，途中都會見到好多盛開嘅花，例如錦繡杜鵑、馬利筋、 簕杜鵑等等。小編最鍾意可愛花，一朵朵小藍花，真係名乎其實好可愛呢！我地仲有經過直昇機坪，不過就唔比人內進。

中間我地有經過彩虹亭入口，不過小編就冇落去，留返啲腳力一陣行上山。之後再行就會到修女花園，呢度又係一個休息好地方，有幾張石桌石椅比大家休息一下。不過再行入去就會見到警告牌話附近有蜂巢，大家一定要小心。

Tags: Homita郊遊去