今日想同大家去行荔枝窩,呢條路線可以一次過體驗同見到特別嘅地質風貌、古村、鄉郊氣息同客家圍村文化,雖然宜家紅日已經有街渡來往馬料水同荔枝窩,但用自己隻腳行入去,體驗到更多呢!
首先係大埔墟港鐵站搭20R小巴入烏鮫騰,要注意小巴班次比較疏,要夾返時間出發。
落車向九担租方向走,一入去其實係條村,見到狗狗係度慵懶地晒太陽,怕狗嘅朋友大膽少少行過去啦,啲村狗見到人都唔吠,一隻二隻係度曬太陽,唔搞人架!
之後向左行,經過士多可以買啲水、小食,再向右轉至小徑。沿住小徑行,會經過啲田,仲有旁邊有啲村屋,好有田園氣息。
之後就進入林徑,一路都係平路,沿途介見到幾棵紅葉屹立係一片綠色之間,好似風景畫咁啊!好多人都會係度影返幾張相。我地仲見到啲紫色小花,呢邊啲路好易認,跟住啲水聲行就無錯啦!
向前進經過竹林,又好似去咗另一個地方咁,每行幾十米都會發現到唔同嘅植物。
見到呢啲黃色嘅石樁就行啱路啦,呢度係唔可以行車同踩單車架!
繼續向上苗田進發,以前聽人講上苗田有唔少廢墟,但我地就冇見到,反而見到小橋流水,好有古樸嘅味道。不過由啲石橋、石路黎睇,呢度以前應該都係一條小村莊。
由呢度開始就要小心行,雖然地勢平緩,但因為地上都係落葉同石頭,凹凸不平,唔小心啲好易扑親。
係下苗田嘅石碑附近,有一間廢置小屋。其實都認唔到佢原本嘅樣啦,唔知以前係咩人住架呢?
再行入D會見到有啲疊石,大家可以係度影下相,呢度陰陰地度休息一下都唔錯架!水流都幾急,小心唔好跌落水,都唔好係度玩水。
向再前行就會見到走向三椏村嘅路牌,沿路前行,會見到有一處空地,唔少人都會係度停留休息,但唔好玩水啊,呢度好深水好危險架,附近都有警示牌叫人小心山洪、切勿嬉水。
繼續行個地會慢慢越黎越紅,專家估計係因為空氣氧化岩石中嘅鐵質所致。呢度嘅岩石都唔算好紅,附近嘅紅石門比呢度更壯觀!有機會再同大家去睇下!
我地中途仲見到一條去馬料水嘅路,小編就唔敢挑戰啦,因為呢度都有個路牌叫行人唔好行,不過以呢度綁足三隻色絲帶黎睇,應該好多行山高手挑戰呢條路線,但小編勸大家量力而為,唔好行入去。
再向前行見到政府整緊啲休憩設施,年尾就會完工,到時又多個休息地方啦!
行多幾步,好快就到三椏涌,呢度一啲都唔似香港,灣岸係一片片嘅紅樹林,風景靚到個人都放鬆曬,好治癒啊!
呢度好易影到超唯美風照相,Filter都唔洗加!
呢度係印洲塘其中一個照點,大家要好好愛護大自然,要遵守園規啊!
行過一條木板步道就行到三椏村,呢度鄉郊氣息甚濃,仲有現今已經好少見嘅電話亭;大家可以係度去廁所,抖返一陣,又或者去合益蜂場食個飯,呢度好出名架!
再沿指示牌行去荔枝窩,今次小編真係見到識吠嘅狗啦!好彩攝影哥哥夠威猛(?)行咗過去隻狗就退走咗返屋企。係行去荔枝窩嘅路上,都見到幾間廢屋,而其中一間圍住鐵絲網嘅特別陰森,鐵絲網仲比人畀咗個窿,應該係想入去探險。
再前進經過一條小道,下面有一個個排水孔,可能雨季呢度水位會唔一樣,到時有機會再黎睇一下。
行咗3個鐘,終於到達荔枝窩。你可以係村口爬樓梯上觀景台,由高處俯瞰青山綠水嘅美景。
入村嘅路上我地見到好多白花魚藤,好壯觀。可惜我地去當日樹林因為有塌樹危機而封咗,睇唔到聲名遠播嘅空心樹王同五指樟。再行入村就見到好大棵風水樹、協天宮等客家村落特色。大家可以係度遊覽一下,如果有時間不妨係度食個雞粥先走。
小編當日係由梅子林村方向離開,大約個半鐘左右就可以返到烏蛟騰,小編揀呢條路有2個原因,第一係小編唔想原路折返,會用比較多啲嘅時間;第二係因為小編想留體力出去行街,所以無揀到行去鹿頸嘅路,而係揀咗係分水凹接烏蛟騰郊遊徑離開。雖然呢條路相對地勢冇咁高,但都幾崎嶇,一定要小心腳步。行到頂嘅風景都好開揚,再落到去去亞媽笏你嘅回程就去咗大半,好快就會落返去村入面啦。如果係紅日或假日其實都可以搭船返馬料水,就比較輕鬆。
呢條路線雖然唔需要大量登高,但對平時無乜點行嘅上班族而言,都有啲難度。因為係先平後鈄,而且都有返咁上下長(約14公里),我地當日用咗差唔多4個半鐘行晒全程(計埋休息時間),建議大家預早少少同帶定補及入去,途中其實有好多休息嘅地方,都有幾個補給點,亦都有食飯嘅地方,放假黎行一日會相對輕鬆,亦都有更多休息同遊覽嘅時間。
難易度:⭐⭐✨
主要係睇耐力,畢竟係行鈄路之前要行約2-3小時平路,然後先上山離開。
打卡度:⭐⭐⭐⭐⭐
紅樹林、紅色岩石、石樁路同好多小橋、白花魚藤林等等;要山有山要水有水、隨便打卡唔洗逼。
設施完善度:⭐⭐⭐⭐
有大量休息位,指示牌、警告牌、石碑、路牌沿途可見。村落中均有補及,亦都有洗手間。
路線地圖:
走嘅時候都要睇返時間表,5點15分嘅班次會有好多人搭,最好早少少過黎等車。
由於走嘅時候人會比較多,如果搭唔到小巴,又唔想等一個鐘搭下一班,可能要Call的士去大尾篤搭20C返大埔(5-10分鐘一班)或者直接搭的士(約$110到大埔墟港鐵站)出去。
最後提提大家行山要準備充足,量力而行;最緊要係愛惜香港大自然,自己嘅垃圾自己帶走啊!今次嘅郊遊習作係咁多,我地下次見啦!拜拜!