東京係唔少人嘅旅行首選，但其實鄰近嘅橫濱亦有玩樂購物好去處！位於橫濱嘅「MITSUI OUTLET PARK 橫濱港灣」現正進行大規模翻新工程，將於2020年4月完工，以全新姿態示人！店舖數目將由80間大幅擴大至170間，當中包括多間首度進駐日本及關東嘅品牌隆重登場。

座落橫濱嘅「MITSUI OUTLET PARK 橫濱港灣」於2018年年尾開始進行閉館重建工程，經過約1年時間後，將會於2020年4月重新開幕！今次翻新以「NEW MARINA LIFE」為慨念，讓到訪嘅客人喺觀賞亞洲最大嘅遊艇碼頭嘅同時，可以購物或用餐，又或者喺露天廣場進行戶外體驗活動，感受海邊環境嘅舒適同熱鬧繁華，感受海邊特有嘅優質生活品味。

店舖數量由翻新前嘅80間增加至170間，其中12間更係首度進駐日本，包括時裝品牌「FREDY&GLOSTER  OUTLET」、「NERGY」、「DIESEL/Glorious Chain Café」等，以及「garage YOKOHAMA」等3間於關東商業設施初登場店舖。

除咗新增嘅店舖，當然亦不乏世界級人氣品牌加盟，如「FURLA」、「kate spade NEW YORK」、「MICHAEL KORS」等，壯大MITSUI OUTLET PARK 橫濱港灣嘅品牌版圖。

除咗新增店舖及設施外，MITSUI OUTLET PARK 橫濱港灣嘅外觀及空間設計亦非常矚目。以白色為基調嘅外牆與海洋深藍色互相配合，有希臘海邊白色小屋嘅感覺，為碼頭周邊環境添上一份活力。

帶住小朋友就唔可以血拼? 其中面積超過2,000平方米嘅大型中庭「Central Court」，比客人喺購物或回程前稍作休息，並提供充足戶外空間比小孩玩耍。MITSUI OUTLET PARK 橫濱港灣亦提供免費育兒空間「Baby Lounge Uminomori」，貼心照顧每位媽媽嘅需要。

此外，向海嘅美食廣場集結橫濱同周邊地區嘅當地知名餐廳，例如嚟自鎌倉江之島嘅「LONCAFE」、橫濱嘅「本丸亭」同「白楽栗山製麺」等。翻新後嘅美食廣場既能品嚐多款當地美食，更設有有露天座位，供客人一邊用餐一邊欣賞遊艇碼頭嘅魅力，非常寫意。