今次窮人食家去咗大圍M.C.Box，好多人都話呢個街市整咗之後多咗好多好嘢食，我地又一齊睇下50蚊可以係度食到啲乜啦！

寶泰車仔麵

煎釀三寶 $11/5件

呢間車仔面檔有好多人排隊買小食，小編見買車仔麵嘅人唔算好多，但買小食就企晒人，買咗5件煎釀三寶，平就唔算平，不過就幾好食。凍咗先食都唔會成口油。

青辣椒

椰汁西米糕 $15/3件

小編私心推薦。可能小編自己真係好鐘意食泰國嘢同甜嘢，呢間嘅椰汁西米糕好有層次好香甜，仲食到粒粒粟米，正！

仲生美食

蔥花雞蛋腸 $16

布拉腸雖然呢一排成日比人提起，不過真正賣嘅地方就好少。叔叔好有心機即叫即整，真係比一般腸粉滑，同埋食到好重蔥味。腸粉皮比我想像中厚身，同埋大家一定要勁落豉油！佢地豉油真係有啲淡，要淋到出面茶樓變晒食先好味。

小食大亨

燒賣 $8/7粒

呢間小食大亨其實係街市出面。有好多唔同小食賣，仲有珍珠奶茶添！燒賣幾彈牙，不過小編唔鐘意呢度嘅辣油。

今次我地黎到呢個新式街市，的確係非常乾淨，但嘢食唔算特別平，可能租金都係其中一個因素，反而大圍站出面可能仲平啲。不過50蚊都夠我地飽有突，小編仲拎埋椰汁西米糕返屋企食添！蔥花雞蛋腸真係幾大份，一個女仔都未必食得晒，記住嗌埋男友去幫你食喇！今次窮人食家係咁多，你地又有咩小食推薦呢？話比小編知，等我又去試吓????