今日想同大家行橋咀洲,橋咀洲係香港聯合國教科文組織世界地質公園景點之一。呢個細又長嘅島嶼1.4億年前形成嘅地質奇觀,如果您想搵個地方hea返一日,搭下船、遊山玩水、吹海風、睇風景,呢度就啱晒你!
橋咀洲位於西貢市東南方嘅西貢海,橋咀郊野公園係全香港面積最細嘅部野公園,長約2500米,寬約500米,最高點海拔136米。你可以係度睇到好靚嘅海岸同岩石奇景、又可以漫步輕鬆短途嘅遠足徑,人氣熱啲介可以於藍海暢泳,好似出咗去熱帶國家旅遊區咁啊!
首先大家可以去西貢碼頭買來回船飛,我地去嘅時候係閒日,船家話係半個鐘一班船,都算密。
落到船向前行少少可以見到橋咀泳灘,夏天唔少人會黎呢度或者另一邊嘅半月灣游水架!你會感嘆香港仲會有如此水清沙幼,咁感受到大自然嘅鬼斧神工嘅地方。
呢個小小嘅碼頭都好岩影相架!
再向前行,就會見到一條天然沙堤,連接橋頭島,呢種海岸沉積地貌,地理上稱為連島沙洲。沙堤長約250米,兩側為中細顆粒砂石夾雜貝殼碎屑組成,中間則由含礫粗砂組成。
沿路我地見到一個個龜裂嘅岩石,啲人話佢地叫「菠蘿包石」,其實即是石英二長岩,受到不同程度嘅風化侵蝕,呈現出奇特嘅裂紋。橋咀洲上典型嘅火成岩仲有火山角礫岩、流紋岩等。
過到對面依地質步道向上走,突然又有少少入咗山林嘅感覺,大家可以係橋頭高點遊覽一下,小編仲見到好多人係度大嗌,會有好大回音,好好玩。
之後開始下降,到達沙地,就會有見到石灘同岸邊嘅燈塔。企係石堆上眺望牛尾海、西貢海、釣魚翁同鷓鴣山,真係風景如畫,放假就應該黎感受一下大自然嘅寫意。
呢度仲可以睇到好多小生物,蟹仔、魚仔、螺、珊瑚隨處可見,大家可以影下相,但記住唔好破壞佢地嘅生態啊!
記住唔好係度玩到盡先走啊!因為你仲要原路翻過小小山行過連島沙洲先有船出返去。同埋記得腸潮漲潮落時間。呢條連島沙洲時隱時現,所以先特別具吸引力,而今次我地走嘅時候已經開始漲潮,望住條路慢慢埋入水入面,感覺好特別。但完全漲潮嘅時候,就行唔到返出去架啦!
如果你都想行連島沙洲過對面,就要預先睇定潮汐漲退時間,潮水高度低於1.4米嘅時候先可以行上連島沙洲。有關潮汐漲退資料請參考香港天文台網站及地質步道上嘅潮汐漲退資料牌。
難易度:⭐
基本只要夾到退漲潮時間就可以橫過連島沙洲,小朋友都可以輕鬆挑戰。
打卡度:⭐⭐⭐⭐⭐
話明係香港聯合國教科文組織世界地質公園景點,再加上時隱時現嘅連島沙洲等大量打卡位
設施完善度:⭐⭐⭐
係碼頭附近有燒烤場、洗手間同小食亭,建議大家去咗洗手間同帶備食水同少量食物先好行入去。
其實呢度仲有條山路可以行去半月灣,等人氣暖少少,小編去玩完水再同大家介紹啦!最後提提大家行山要準備充足,量力而行;最緊要係愛惜香港大自然,自己嘅垃圾自己帶走啊!今次嘅郊遊習作係咁多,我地下次見啦!拜拜!