韓國午餐肉品牌「SPAM」喺Facebook上載咗一張午餐肉雪條嘅相,寫住SPAM BAR「스팸바」,並描述午餐肉雪條有燒烤嘅味道 !咁衝擊嘅組合當然成功引起熱話,令一眾網民粉粉議論究竟係咪真係要推出呢款產品!如果係真嘅話,各位午餐肉控又想唔想試呢?
午餐肉係唔少人嘅早餐必備食物,一大早食一個午餐肉公仔麵即刻人都醒晒。雖然係咁,應該無人想將午餐肉變成甜品。估唔到韓國人氣午餐肉品牌 SPAM 反其道而行,宣佈推出午餐肉味雪條 〜
SPAM 係韓國人氣午餐肉品牌,唔少遊客都會買午餐肉做手信。雖然官方無確實表示會推出,但就似乎好想嘗試,所以先喺社交網站上試下水溫,睇下大眾反應。帖文至今已收穫近二千 Like,或者大家都有興趣嘅話,日後真係有機會喺市面上見到佢。
唔少香港網民嘲笑係「暗黑料理」,話:「去佳寶買凍肉加D鹽含下我估差唔多味」、「食用方法:可以配出前一丁一起食用」、「今日愚人節咩?」、「明眼人都知係生化武器」、「你食埋我嗰份」、「劣食新天地」、「落街嗌個沙嗲牛麵配落去係咪可以冰火二重天?」
除咗午餐肉雪條,SPAM 官方 Facebook 近日仲分享咗幾款「新品」,包括午餐肉沙冰、午餐肉檸檬茶、午餐肉蠟燭、午餐肉香水等,不過小編覺得最正都係午餐肉蠟燭!一點,成間房都勁香,啱晒吃貨!
其實SPAM官網不時會分享一啲午餐肉食譜,例如呢個中間夾住炒飯再煎嘅午餐肉,望落去好吸引啊!甚至製成午餐肉壽司同漢堡都OK!大家不妨去攞啲靈感,嘗試一下新奇嘅午餐肉料理啦!
雖然炎炎熱日少不了食雪條消暑,但咸香嘅午餐肉突然變成雪條,真係令人完全想像唔出會係咩味道同口感!不過目前官網未有更準確消息,就等我哋先好好期待一下!