下個月有兩大節日,農曆新年同情人節,無論有冇男女朋友都要醒醒定定,有嘅就對佢好啲,無嘅就加緊腳步啦!如果唔係就要過完單身情人節之後由年三十比姨媽姑姐四嬸六叔審問到初七都未審完。今日想同大家推薦深圳一間網紅店,好適合約會、表白、求愛、出Pool,快啲帶你另一半或者心儀嘅人去試吓啦!
據說人一生會遇到約2920萬人,兩個人相愛的機率是約千萬分之五,多幸運,我遇見了你。一入門口就見到甜到爆炸嘅文字,小編咁無慾無求嘅人都覺得少女心爆炸啊!成間鋪頭以粉、白、金為主調,戀愛感嘅配色加上鮮花、公仔嘅裝飾,女仔一入黎就心花怒放,男人肯陪個女仔黎,都知咩事啦!
初櫻戀時 ¥42
呢個粉紅色心心係店員推薦比小編,外表100分,睇落好似好甜,但出奇地佢甜度唔高,最甜嘅係圍住心心嘅一粒粒糖珍珠,就好似戀人之間嘅一個個甜蜜回憶;蛋糕外表柔嫩夢幻,內餡蛋糕鬆軟、忌廉幼滑微酸帶甜,有種不確定感,但又令人一啖接一啖好想食曬佢。個名改得好貼切,食落去真係會連繫到初初喜歡上一個人嘅感覺。
拿鐵雲朵 ¥28
佢係分開一杯棉花糖奶同一杯咖啡上嘅,就甘外表已經融化一眾女心但小編叫咗凍飲,啲咖啡溶唔到嚿棉花糖,要高難度係飲管倒啲咖啡入去再浸棉花糖落去,比人笑所以記住要叫熱飲啊大家,如果唔係就同小編組隊坐埋一檯啦。Latte唔會甜,大家可以因應喜好溶啲棉花糖落去調整甜度,都幾好飲。
維C大爆炸 ¥26
其實就係柑橘系水果梳打小編自己覺得算幾清爽,因為店內仲有好多夢幻飲品所以唔會特別去點呢杯,但同行朋友極度唔喜歡呢杯飲品,飲落好似維他命C丸沖開嘅汽水咁,男士慎點。但如果鐘意Fresh一啲嘅口感或者本身就好鐘意橙啊桔啊之類,都可以考慮一下。
美藝甜本身係以馬卡龍聞名,大家可以一試。呢度唔止有甜品,仲有西餐同分子料理(需預約)評價都不俗,大家記住帶埋心上人黎拍下拖啦!
美藝甜馬卡龍
地址:新湖路99號壹方城內B1層
電話:0755-83382868
謍業時間:11:00-22:00(日至四);11:00-22:30(五、六)