今日想同大家行河背水塘，河背水塘係香港水塘之中最細嘅一個。河背水塘坐落於香港元朗八鄉、錦田河上游，屬於大欖郊野公園嘅一部分，自然環境非常優美。

水塘容量50萬立方米，S字形十九孔溢洪大壩長157米，高17.4米，屬灌溉水塘，主要用作灌溉新界西北的農田。水塘中間有座小島，四周蒼翠樹木襯托，環境清幽；附近昆蟲﹑鳥類同植物品種非常豐富。

首先大家可以喺元朗搭71號小巴，於總站河背村落車。

小巴站地圖：

落車之後會見到河背村入口，直行入去就見到車路，向左轉沿路向上行，經過燒烤場之後右轉，繼續向上行就會見到水塘！沿路見到芒草，但小編都係鐘意藍天白雲嘅景色多啲！

  過咗堤壩可以去河背水塘家樂徑繞一圈，家樂徑水沿塘而建，全長只有2公里，大約半小時就可以行返出終點嘅涼亭，之後可以原路折返，同樣搭返71號小巴返回元朗市區。

呢條路線除咗開始嘅時候上坡需要少少體力，其餘時間都非常輕鬆好行，而且沿途有藍天白雲、有芒草，水塘風光又好，放假過黎都唔錯架，唔會耗費太多時間同體力！

難易度：⭐⭐✨ 只係開頭上山時有少少鈄路，基本上都非常平緩。

打卡度：⭐⭐⭐ 錦上路全景，S字型大壩，塘中島，芒草，天氣好可以一網打盡。

設施完善度：⭐⭐⭐ 途中有燒烤場，洗手間，亦有桌椅、長凳以供休息。

路線地圖：

最後提提大家行山要準備充足，量力而行；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！拜拜！