大家鍾意食薯片嗎？早前韓國有一款薯片被瘋狂搶購，雖然只係海鹽口味，但就大受韓妹歡迎，原來係因為佢特別嘅「油漆桶」包裝。呢款薯片最近香港都買得到，想試嘅朋友記得留意喇！
有Follow開韓妹IG嘅女生，一定對呢一款「油漆桶薯片」唔陌生。薯片罐外型以藍白色為主，望落真係幾似油漆桶。Bonilla a la vista雖然亦有推出普通包裝嘅薯片，但論人氣當然係油漆桶大獲全勝！IG 上更加係一人一桶，紛紛攞佢佢四圍打卡。
雖然喺韓國大熱，但其實呢款薯片係西班牙品牌Bonilla a la Vista嘅熱賣商品。最開始「油漆桶薯片」只係街頭販賣嘅小食，大受捧場之後，先成為西班牙必買手信之一。薯片採用有機薯仔搭配純橄欖油油炸而成，調味部分亦非常簡單，只用咗一啲啲海鹽嚟增添鹹味，食落唔會太鹹，被稱為最天然健康嘅零食！
唔少食過嘅網友都話食落「唔油唔鹹」、「口感酥脆」、「 感受到橄欖油香氣，好順口」，不過亦有人提出由於只有用少許鹽巴調味，所以薯片口味會稍微清淡，可能比較唔適合重口味人士。
一罐「油漆桶」裡面有500g嘅薯片，份量多到要用油漆桶裝，抱住一大桶邊追劇邊食一定超幸福！雖然呢款薯片算係比較健康嘅零食，但油炸食物都係少食為妙，女生唔好因為佢係「健康零食」而瘋狂食啊～
既係潮物，又喺韓國闖出名堂，嚟到香港嘅售價當然亦唔低，最近香港Market Place by Jasons就引入咗呢款薯片，售價為一桶$238。韓國售價一桶約₩27000，即$180左右，雖然比香港平上一截，但就要上網訂或者專程去韓國買！ 望住個價錢，真係令人深深感受到打個靚卡要付出嘅代價。
雖然售價比起其他牌子嘅薯片高好多，但係，呢款薯片除咗比較健康外，食完仲可以將油漆桶當收納桶或裝飾品再用，都叫值得嘅！
西班牙油漆桶薯片
價錢：$238
Market Place by Jasons 購買地點：屯門黃金海岸、將軍澳Popcorn、九龍灣德福廣場、旺角朗豪坊、尖沙咀K11、尖沙咀iSquare、西九龍奧海城2期、淺水灣購物中心
備注：數量有限，售完即止
官方網頁：www.facebook.com/marketplacebyjasons
