Homita - 珍珠奶茶熱潮 盤點3款熱賣珍珠奶茶朱古力 奶茶控必買~
#美食五月
×
Quiz
Beauty
+
Body
+
Fun
+
Foodie
+
Me
Time
+
Shopaholic
+
Travel
+


  


珍珠奶茶熱潮 盤點3款熱賣珍珠奶茶朱古力 奶茶控必買~
吃 Dining  |  by CASS  |  10 months ago   

台灣甘百世、日本TIROL-CHOCO、日本7-11都推出「珍珠奶茶朱古力」,將大家最愛嘅珍珠奶茶變成零食,用奶茶口味朱古力包住黑糖珍珠軟糖,食落好似真嘅珍奶一樣,仲未食過嘅奶茶控快啲去買盒試下啦! 

#台灣甘百世

一撕開包裝就聞到濃濃嘅奶茶香味,外層嘅奶茶朱古力帶有茶香,中間嘅珍珠係黑糖口味嘅軟糖,相當彈牙有嚼勁,口感好似平時珍珠奶茶嘅珍珠,對於珍珠奶茶嘅還原度頗高,每次去台式飲品店必叫珍奶嘅奶茶控一定試!

不過有唔少網友認為整體味道偏甜,一次過食太多粒會越食越膩,如果係鍾意食甜嘢嘅人,翻工或者下午茶時間攞嚟當零食過下口癮就啱啱好~

呢款珍奶朱古力一盒有14~16粒,每盒售價為60台幣,粒粒都有獨立包裝,食唔晒可以隨時蓋好盒蓋保存,亦方便大家與好友開心Share。

雪過先食更滋味

另外,因為夏天天氣炎熱,朱古力放喺室溫下可能會融,影響味道同口感,推薦大家可以放入雪櫃雪過先再食,咁樣奶茶朱古力同黑糖珍珠軟糖嘅層次會更分明,食落口感會更豐富,放人去冰冰涼涼嘅感覺就好似飲緊縮小版珍珠奶茶一樣~

#日本TIROL-CHOCO

台灣珍珠奶茶同鳳梨酥聞名全球,係遊客訪台必買嘅美食。呢個風潮吹到日本,日商「TIROL-CHOCO」推出「台灣甜品」朱古力,將鳳梨酥、珍珠奶茶製成朱古力,鳳梨酥朱古力帶有果肉嘅酸甜口感,至於珍珠奶茶朱古力就帶有茶香。

據網站《イベントチェッカー》指出,販售甜食聞名嘅「TIROL-CHOCO」推出「台灣甜品」朱古力,外包裝採用日文拼出口味嘅中文念法外,亦以日文拼出鳳梨酥台語,「旺來酥(オンライソー)」,一包「台灣甜品」朱古力有鳳梨酥4粒同珍奶口味3粒,大受日本人歡迎,超市仲經常賣到缺貨。

「台灣甜品」朱古力一包7粒售價不含稅為100日元。食過嘅日本網友大讚,認為鳳梨酥口味外層光滑,而內饀鳳梨乾同朱古力超級夾,酸甜口感甜而不膩;至於珍珠奶茶口味外層係紅茶朱古力,入面包住仿珍珠模樣嘅軟糖,濃郁又有嚼勁,食落好似真係歙緊珍奶。

 

#日本7-11

日本人其實非常熱愛台式茶飲文化,台式珍珠奶茶店喺日本相當受歡迎,日本亦推出過唔少珍奶甜品,如珍珠奶茶雪條、珍珠奶茶梳乎厘班戟等。最近日本便利店7-ELEVEN(7-11)亦加入「珍珠奶茶朱古力」熱潮!香甜奶茶味朱古力內包住原粒煙韌軟糯珍珠,唔少網民都表示越食越上癮!

朱古力粒外形好似麥提莎。奶茶味朱古力帶有淡淡阿薩姆紅茶香,咬開可食到煙韌珍珠,口感豐富,令人忍唔住想一粒接一粒食唔停口。

不過以上幾款「珍珠奶茶朱古力」喺香港暫時無得賣,想食嘅就要搵代購,或者託去日本台灣旅行嘅朋友買翻嚟啦!

如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
CASS

Editor

You May Also Like
This Week's Top Post
forte「牛魔王盛宴晚市套餐」 任食五款牛扒、三款薯條
Y小編 - 3 months ago
九十後良心青年主理 旺角90s LAZY 薯條真的超好吃!
Y小編 - 7 months ago
Superfood都可以好好食! 「美心藜麥麵包系列」
Y小編 - 1 year ago
DREYER’S REAL DELIGHT乳酪條只得86 kcal!可以真正放縱自己!
Little Peach - 9 months ago
夜晚8點後唔可以食野?8款野食幾夜食都唔肥
 - 2 years ago
銅鑼灣高質西餐 阿麥廚房
Y小編 - 2 years ago