芬蘭一站式室內活動樂園 SuperPark以遊戲運動概念為主題，全場佔地45,000呎，分為3個活動區：冒險地帶、遊戲競技場、自由式殿堂，擁有超過20款動感室內遊戲，集運動、娛樂、競技於一身，適合不同年齡層。

小編日前就去咗 SuperPark 親身試玩6大新遊戲，想知玩後感就一齊嚟睇吓啦！

玩家可以根據個人能力及年齡去唔同區域遊玩，「冒險地帶」內有迷你賽車場、巨型滑梯、空中滑索等適合小朋友嘅遊戲。青少年則可以到「遊戲競技場」試玩拳擊、足球、籃球、棒球、保齡球等練習場，最正係有雷達及電子系統測量成績，用嚟比賽鬥高分最啱！若果想挑戰自己，更加可以喺「自由式殿堂」玩滑板、彈床或攀石等難度較高嘅運動，最啱追求緊張刺激嘅你嚟一展身手！

小編首先試玩嘅就係智能老師﹒Lü，包含超過20個互動投影遊戲，玩家要根據各種遊戲模式，透過投擲地上嘅籃球到投影牆，嚟完成遊戲嘅指定任務。呢個遊戲除咗跑跑跳跳之外，仲講求腦筋急轉彎，考驗手腦並用嘅能力！遊戲最多可以四個人同時挑戰，大家快啲嚟一決高下~

小編第二樣試玩嘅係iWall體感遊戲，玩家唔需要手持設備就能進行全身動作識別。同樣擁有多款遊戲選擇，例如模擬滑雪、跑酷遊戲、星際守護等。小編都係試玩咗兩款遊戲，第一款就係瑜珈大師，玩家只要跟住螢幕中的嘅瑜珈大師做一模一樣嘅動作就得。系統會根據動作嘅相似度進行不同嘅回合評分。第二款就係需要對戰嘅傳球遊戲，除咗需要進攻，將球傳入對方龍門外，仲需要接住對方傳嚟嘅球，進行防守~

小編第三樣試玩嘅係超級智能拳手，你可以選擇沙包模式或拳手模式，以及微調選項如距離及反應，然後戴上拳套就開始，擂台上嘅沙包會移動閃躲，玩家要捉緊時機，喺沙包往前時攻擊，成功擊中沙包嘅話會扣除電腦嘅生命值，玩家如能喺限時內擊倒電腦就贏出拳賽~ 每次用完拳套後，工作人員都會即場消毒，清潔後先會比下一位用，所以唔需要擔心衛生問題！另外，拳套有大size同細size之分，大人細路都玩得！

忍者障礙陣嘅設計靈感來自電視真人騷Ninja Warrior，因此包括10種不同元素，如拳爬、跳躍、疾跑等，由入門級以至專家級嘅不同障礙陣。3個障礙陣共設有7種障礙，每個陣可以各自成為一個玩樂區，亦可以視3個陣為1組具有漸進難度嘅挑戰。過關途中涉及唔少複雜動作，一齊嚟感受一下真正嘅忍者訓練啦！

講咗咁耐，係時候挑戰下啲勁嘢，小編揀咗超級攀石賽道同彈床大激鬥，並認為呢兩樣係十分值得玩嘅活動！超級攀石賽道一共有4道8米高嘅攀石牆比你揀，成功攀上最頂後按下攀石牆上嘅圓形按鈕，之後就可以放開晒手手腳腳，放鬆身體微坐，下降系統就會立即啟動，令攀爬者安全地慢速下降至地面。小編覺得向上爬唔難，最難嘅係要突破心理關口，放開雙手自由下墜嘅一刻，小編試過後覺得其實無想像中咁恐怖，因為下降速度好慢，不過如果真係咁「放唔開」嘅就一手一腳爬翻落地面啦！

至於彈床大激鬥呢就加入咗數碼元素，彈床旁邊有一個屏幕，有個人遊戲同對戰遊戲選擇。個人遊戲嘅玩法就係要高高低低咁跳，頂中畫面中飛過嘅雀仔就有分啦。至於對戰遊戲就係要同對面玩家一齊玩嘅，今次就除咗跳高之外，仲要左右閃避，只要踩中對方角色嘅頭就有一分，一局結束後分數較高嘅就贏~ 玩完遊戲仲可以由彈床上跳到海綿池中，十分有趣！

小編對 SuperPark 嘅評價係好玩加抵玩！玩到攰可以到外面嘅餐廳休息及進食，憑手帶再入場，真係由天光玩到天黑，玩到筋疲力盡為止。

為咗令大家呢個暑假玩得盡興，SuperPark即日更加推暑期限時優惠，萬勿錯過啊﹗

SuperSummerPass暑期通行證$498，於本港學校就讀的全日制學生可以於7月2日起至9月1日無限次入場，暢玩超過25款運動遊戲，包括6項全新活動!名額有限，先到先得，售完即止!

入場費已包含借用各類運動配備，例如滑板、頭盔、繩索、拳套等，場內所有活動均在工作 人員指導下進行，當中大部份為經驗豐富的教練，當然亦無須畏懼日曬雨淋、蚊叮蟲咬等室外活動所帶來的煩憂。

門票 (以官網最新價格為準)

平日（營業時間﹕上午10時至晚上9時）

• 一日門票: 港幣$180
• 「下午6時至晚上9時」時段門票: 港幣$120

周末、公眾假期及學校假期（營業時間﹕上午9時至晚上9時）

• 一日門票: 港幣$250
• 「上午9時至下午1時」 時段門票*: 港幣$180
• 「下午1時30分至下午5時30分」 時段門票*: 港幣$210
• 「下午6時至晚上9時」 時段門票: 港幣$150

*時段完結時將為客人提供溫馨提示

電話: 3611 0139

網址: https://superpark.com.hk/zh-hk

地址:  香港九龍海輝道18號一號銀海地下 (鄰近奧海城)

由奧運站A2出口前往奧海城一期，乘扶手電梯落一層，商場出去街道後向左行，過馬路後往沿海方向直行，直到見到迴旋處，上行人天橋過對面，落天橋後向左行，沿著一號銀海旁的小徑走到盡頭，就會見到 SuperPark 黃紫色的入口啦~ 由奧運站行過去，大約10分鐘左右~