萬眾期待嘅《反斗奇兵 4》將於7月11日正式上映，呢齣作為唔少人童年回憶嘅迪士尼電影，自然引發起唔同風潮。例如帶嚟好多以反斗奇兵為主題設計嘅打卡地方，好似海港城露天廣場嘅 Our Toy Stories，就有反斗奇兵嘅大型擺設同攤位遊戲。咁香港以外有咩地方朝聖? 必定要數韓國首爾梨泰院嘅Toy House Cafe！
Toy Story一眾角色現身於韓國首爾梨泰院，由迪士尼官方授權嘅反斗奇兵Cafe「Toy House」（토이하우스）！Toy House前身係以Winnie the Pooh為主題嘅Cafe，依家為配合Toy Story反斗奇兵4電影上映，重新裝修成Toy Story主題。
Toy Story主題Cafe樓高3層，色彩繽紛嘅環境佈置令人仿如走進《反斗奇兵4》電影之中。每層分別以不同主題佈置，每個角落都佈滿胡迪、巴斯光年、三眼仔、勞蘇、薯蛋頭先生等經典角色~
地下係Toy Story Pop Up Store，空間以蠟筆繪畫嘅Toy Story角色紙箱作裝飾，售賣各種Toy Story週邊商品，例如大小型公仔、貼紙、各種文具、明信片，各位Toy Story粉絲去之前記得準備充足嘅銀彈！
戶外還有反斗奇兵照片牆，牆上貼滿蠟筆繪畫嘅Toy Story角色~
上一層到1/F則係咖啡店，走滿滿嘅工業風，供應飲品及小食。呢到融入咗好多經典元素，打造成一個Toy Story休閒空間，而且更有三眼仔夾公仔機拍攝區。場內還會連續播放3集《反斗奇兵迷你Show》。
Toy Story大型燈牌，連最新角色小叉亦有燈飾佈置~
仲有以Andy房間為藍本打造嘅打卡位置，不過呢個區域只限於圍欄外拍攝，行人止步~
再上一層就係天台，呢度以露營為主題，擺放咗巨型胡迪、巴斯光年模型。場內有露營車同木椅、另一邊則擺放咗薯蛋頭先生嘅通緝海報、公仔佈置等，隨便影都非常有故事氣氛，令打卡造型提升，十分可愛!
呢間韓國反斗奇兵Cafe是期間限定嘅Pop-up Cafe，鍾意Toy Story的朋友要把握機會快到韓國朝聖啦～
Toy House （토이하우스）
地址：首爾龍山區梨泰院區梨泰院洞 293-10（서울특별시 용산구 이태원동 293-10）
交通：首爾地鐵6號綫綠莎坪站2號出口，步行約10分鐘
或 首爾地鐵6號線梨泰院站1號出口，步行約12分鐘
期間限定：即日起至2019年10月
營業時間：星期二至星期五 12pm - 10pm
星期六至星期日 11am- 10pm（逢星期一休息）
