挪亞方舟「e-Planet夢想星球」自然保育主題 四大光影互動展區 打卡好去處

挪亞方舟「e-Planet夢想星球」自然保育主題四大光影互動展區打卡好去處

港 Wandering | by CASS | 4 years ago

馬灣挪亞方舟將於7月推出全港首個以大自然為主題嘅光影互動展館「e-Planet夢想星球」。館內有4個光影展區，分別以森林、海洋、四季及未來城市為主題，以光、影、音互動技術嘅方式，呈現大自然生態之美，並注入環保信息，打造一個遠離煩囂嘅休閒玩樂兼打卡熱點。

躍動之森　Breathing Oasis

森林係動植物嘅居所，但係過度嘅開墾令生態受破壞。訪客首先會踏進一片漆黑嘅景象，強烈感受到因人類造成嘅環境破壞。隨住步伐及巨型屏幕上嘅影畫轉變，訪客會置身一個重生、充滿活力嘅「躍動之森」之中。訪客只要揮手、觸碰屏幕，屏幕中嘅動物便會隨動作跑動、擺頭等，與訪客進行互動，宣揚人類與動物之間和諧共處。

藍色奧秘 Deep Blue Odyssey

一踏進「藍色奧秘」展區，場內嘅牆壁及地下均投影出蔚藍嘅海洋，訪客猶如完全置身於寧靜嘅深海之中。訪客可帶上3D眼鏡，從巨型屏幕觀賞一段長達4分鐘嘅3D短片，近距離感受各式各樣嘅海洋生物喺周圍游走，欣賞海底生物嘅奇觀及美態。片尾更帶有環保教育信息，提醒我們反思人類日常各種行為對海洋嘅影響，鞏固大眾嘅保育意識。

千色四季 Wondrous Season

巨型屏幕上將投射出流水瀑布、北極光、晚秋紅葉同螢火蟲夜空等多種不同嘅自然景觀，如幻似真嘅影像吸引訪客去伸手觸摸，而景觀亦會隨訪客嘅動作一同互動，令訪客有如親歷其景。唔需要到訪外地都能欣賞難得一見嘅四季景色，呢個展必定會成為熱門打卡位！

未來城市 Future City

未來世界會係點？訪客可以喺特定嘅畫紙上發揮創意，描繪出心中嘅理想城鎮，為未來城市嘅不同元素，如汽車、飛機、機械人及孩童，注入色彩及形象。完成後便可掃瞄作品，糅合科技轉化成四周巨型數碼屏幕上嘅動畫，訪客更可輕觸作品，令屏幕上嘅飛機汽車行駛得更快，創造更美好嘅夢想星球。最後更可將您創作嘅作品，製作成咕????帶翻屋企紀念！