上次小編同大家介紹咗一間抹茶網紅店，今次就同大家繼續去深圳發掘靚靚餐廳。
Tony Flower由內地時尚教父Tony打造，據說有提供深圳最靚嘅下午茶；裝修方面以黃色為主，未入鋪頭已經見到由黃色花朵砌成嘅兔仔同復古車，行入鋪頭之後第一個感覺就係好黃啊！之後會發現店主應該對英國田園風好嚮往，因為大部分物品擺設都好有田園Style，仲有好多動物擺設。
隨後踏上樓梯，店內嘅風格劃分為幾區，有書房Feel、貴婦梳化、西餐廳等等。其實每一區都好有特色，但小編就咁睇就有D亂，不過如果係黎打卡影相呢度就真係夠曬多景啦！
由於我地去到嘅時候天色已晚，所以我地就叫咗晚餐黎食。老實講，黎之前其實我都查過呢度嘅食評，大家對下午茶嘅評價都係話好靚但唔太好食，所以我地就無叫到啦！但其實以晚餐黎講，佢嘅食物其實唔算差，不過裝修太用力，令人對食物嘅期望過高啦！一齊睇吓我地食左啲咩？
藍帶芝士卷 ¥48
藍帶芝士卷係以豬扒夾住芝士捲成肉捲後再裹蛋液、麵包糠油炸。上碟時已經切好成入口大細。肉捲外皮炸得都幾酥脆，但豬肉唔算好嫩，溶化嘅芝士有拉絲效果，配埋青色嘅薯蓉又唔會好膩，幾好食。
海鮮意大利麵 ¥78
一上菜就俾2隻蝦吸引咗，其實個意粉係幾好食嘅，但有少少腥味，經過我地細味之後發現腥味黎自佢嘅花甲。不過佢嘅主食份量係幾細架，如果好似小編咁帶個餓扁嘅男人去就要嗌多幾碟啦！一碟係無可能飽的。
蕃茄牛肉千層面 ¥48
小編最鐘意嘅千層麵！酸度甜度咸度都岩岩好，不過麵身軟咗少少，呢度嘅食物全部都為打卡而生，擺得好靚呢！
暖意可可 ¥48
本身呢杯嘢唔係嗌俾自己嘅，但我飲咗一啖呢杯嘢就屬於我啦！佢真心好好飲啊！佢嘅朱古力唔會太甜、太澀，濃淡度適中，仲有好香嘅椰子味！好驚喜！留意返佢只有熱飲提供，冬天飲一杯暖暖嘅朱古力，好幸福啊！
浪漫層疊 ¥48
又一杯打卡滿分嘅作品；其實就係玫瑰奶蓋，好重玫瑰花醬味，飲之前請充分攪勻，如果唔係飲到後面就會無曬味架啦，仲要飲唔到個奶蓋添！
其實小編自己就覺得，食到後來隻眼好攰，因為成間餐廳都採用明度好高嘅鮮黃色，連廁所都係鮮黃色架！雖然好特別，但我諗真係久久食一次好啦！可能下次會叫簡餐，因為佢地出餐都幾慢架，食啲簡便啲嘅餐點可能會比較適合。今日嘅分享係咁多，下次再同大家走訪唔同嘅網紅店啦！
