日本著名零食品牌卡樂B，自1994年起已屹立香港，薯片口味一直層出不窮，每次都為零食迷帶嚟無限驚喜！今年係卡樂B嚟到香港嘅25周年，特別推出兩款全新香港地道口味：「深井燒鵝味薯片」同「細蓉味薯片」，每一塊都充滿地道特色滋味，每一口均充滿香港濃厚本土情懷。
全新期間限定推出嘅「深井燒鵝味薯片」同「細蓉味薯片」，兩款口味都深深滲透港人情。60年代時期，燒臘店相當盛行，燒味係開飯必備餸菜，街坊經常「斬料」加餸，而當中最受歡迎嘅就係燒鵝啦。時至今日，燒鵝已經係港式燒臘嘅代表，而深井燒鵝更加係聞名中外，唔少遊客慕名而來，只為品嚐一下呢道專屬港人嘅美食光榮！
而細蓉則係指餛飩麵，按份量分為「細蓉」、「中蓉」同「大蓉」。而「蓉」字嚟自「芙蓉」二字，用嚟形容透薄嘅餛飩皮喺湯中散開，尤如綻開嘅芙蓉花。餛飩麵起源於廣州，但卻發揚於香港。50年代至今，港人仍然熱愛「細蓉」，而「細蓉」亦已經成為香港麵食嘅代表。
兩款全新口味薯片各具特色，小編已經搶先一步試食過啦，喺度同大家分享一下食後感~
先講下「深井燒鵝味薯片」，一打開包裝袋已經聞到超香嘅燒鵝味，好似啱啱出爐熱辣辣嘅燒鵝！咬落去，薯片又厚又脆，仲有陣燒鵝嘅炭燒味同醬汁味，味道啱啱好，惹味 得嚟又唔會太鹹，保證一試難忘；「細蓉味薯片」 咬落去同樣又厚又脆 ，入口則散發淡淡鮮蝦餛飩鮮甜味，呢款口味就比燒鵝味清淡 ，如果話燒鵝味係一擺入口就香味四溢嘅話，細蓉味就係食完齒頰有種淡淡嘅餘香。
卡樂B見證住香港嘅時代變遷，亦陪伴港人共同成長，締造集體回憶。新出嘅兩款限定口味都充分代表住香港美食，亦係屬於香港人嘅味道，有濃厚本土情懷。
全新「深井燒鵝味薯片」同「細蓉味薯片」為厚切V-cut薯片，淨重量55克，由香港工場新鮮生產。產品會於5月尾喺各大超級市場、便利店及零售店發售，建議零售價為港幣10.2元，期間限定萬勿錯過！想親嚐地道滋味嘅零食迷記得買包試下啦~
