難得嚟放假可以俾自己輕鬆下，大家會選擇啲咩消閒活動呢？煲劇睇戲稱得上係首選，而唔少人亦習慣邊食零食邊睇，結果就喺不知不覺間變肥。有研究指出，食用零食嘅份量係會受到影片類型影響！
今次研究係由紐約大學進行，團隊揾嚟84個年齡介乎於20-30歲嘅人士，分別觀看浪漫喜劇、驚悚恐怖呢兩種類型嘅影片，同時於一旁提供薯片、餅乾、朱古力、爆谷等等嘅零食。
研究對象於觀看影片前嘅飢餓程度相約，觀看喜劇嘅人平均只係食咗4.93種食品，而睇恐怖片嘅人就食咗6.45種食物，比前者更多！
其實喺睇恐怖片嘅時候，人會受到劇情影響，出現緊張以及疲累嘅感覺。所以就會出現「安慰性進食」嘅情況，令觀看者攝入更多食物，而選擇時更係會揀選比較唔健康嘅食物。
所以大家睇恐怖片嘅時候，就要記住唔好喺身邊放置太多零食，以免不知不覺間食得太多落肚！
Tags: Homita新鮮事
如果你都想分享你嘅美容、時尚、旅行、運動心得，請將投稿文章連同不多於100字個人簡介同埋近照一張，電郵到： editor@homita.com.hk，文章經小編篩選後更有機會刊登喺我哋FB專頁，一經入選我哋會支付相應稿酬，仲唔快啲來投稿？
Author Information
You May Also Like
