日本係不少港人最愛嘅旅遊勝地，一年去兩三次都已經係等閒之事。然而，時不時都會聽到觀光客於當地做出各種出格行為。有時候，呢啲行為不單單係失禮咁簡單，更有可能已經觸犯咗日本法例！
#插隊
唔好以為插隊係件小事，喺日本係犯法咖！根據「日本國輕犯罪法」中第1條第13號規定，插隊行為將會按情節輕重，處以100萬日元以下罰款，甚至拘留24小時。大家記住要保持禮儀，唔好貪一時之快呀。
#採花
臨近櫻花季節，唔少人都已經計劃好要到當地賞櫻。早前就有報道指出，有觀光客為製造「櫻吹雪」效果，竟然以人手搖晃樹枝，導致枝椏斷裂。另外，亦有人採摘盛開嘅櫻花，製成花環拍照留念。
其實櫻花樹喺日本各地都被視為相當重要嘅觀光財產，當地警察係有權以刑法261條「器物損壞罪」去拘捕破壞者，最高會罰款30萬日元、被判3年有期徒刑。
#強制勸酒
好多香港人都愛好杯中物，聚會時更會邀約朋友一同飲酒，但喺日本就要注意呢個行為係犯法咖！當地「防止醉酒擾亂治安法」第2條就規定，強制勸酒行為將會被處以48小時以下監禁，假如被勸者因醉酒犯事嘅話，勸酒者亦會被定為同罪！
#於計程車內嘔吐
飲酒後，最快捷返到住處嘅方式就莫過於搭計程車啦！但大家要謹記，無論不適程度有幾高，都絕對要避免喺車上嘔吐嘅情況。因為行為違反咗日本民法嘅「契約違反」，觸犯呢條法例將被判處罰款，並需要賠償計程車嘅清潔費。
#酒駕
酒駕喺世界各地都被定義為犯罪，自然日本亦唔例外。「日本国道路交通法」就規定咗，飲酒駕駛將會被吊銷駕照，並處以10年以下有期徒刑，再加上00萬日元以下罰款，而且3年以上10年以內無法取得駕照。
#吐痰
「日本国輕犯罪法」就規定咗，喺公園或公共場所吐痰，將會被罰款1000日元以上，最高罰款可達10000日元，並且會記錄喺個人犯罪前科上。而記錄上並唔會寫明你係犯咩事，只會喺欄中寫上「有」字。單單係一口痰，就被記錄為有犯罪前科實在係太不值得啦！
#決斗
日本公共安全法規定，不論背後有咩原因，經過暴力手段進行個人對決就已經違反咗「決斗罪」，將會被判處6個月以上，2年以下嘅有期徒刑，所以喺日本街道上好少會見到毆鬥事件。
#塗鴉
喺日本，塗鴉建築物被立入建築物毀損罪及物件損毀罪懲罰範圍，觸犯物件損毀罪的話，將會被逮捕，並處以3年以下，30萬日元以下嘅罰款。如果係蓄意破壞草坪，建築牆壁、玄關的話，行為量刑可高達5年。大家千祈唔好以身試法呀！
