今日想同大家介紹呢間位於屯門嘅Miss Coffee，小編山長水遠突登黎食，唔係睇咗啲咩邪惡隱世拉絲嘅食評，而係睇中佢嘅態度同氣氛，覺得一定要黎試一試。

Miss Coffee其實海圖Cafe嘅姐妹店，關於兩鋪之隔嘅海圖Cafe，小編有機會再同大家介紹。Miss Coffee甫進店之際就感受到佢輕鬆嘅氣氛。唔係因為大家都懶懶閒，係因為大家都好享受自己手上做緊嘅事，咖啡師專注沖咖啡、店員都敬業樂業咁工作，間中又閒談幾句，成個氣氛好舒服。

黎到Miss Coffee，就要適應呢度嘅步調，佢地唔係啲連鎖快餐，你點嘅每一樣菜佢地都要時間製作，佢地有刊物架可以供人閱讀，你亦都可以同朋友傾吓計、或者係度聽下歌、影吓相，但就唔好催單啦！呢度樣樣嘢食都係用心製作，慢工出細貨啊嘛！

呢度all day breakfast最貴都只係88蚊，好抵食，而且比出面好多都有誠意，絕對唔慳皮架！小編最鐘意係切開個蛋黃點多士，多士烤得岩岩好，脆卜卜好好味。

大大早餐 $88

班尼迪蛋好有心機擺盤，班尼迪蛋同大啡菇夾住煙三文魚，好吸引啊！

班尼迪蛋配煙三文魚 $53

呢個意粉真心推薦，酸度、甜度同咸度都啱啱好，加上食到煮到軟爛嘅蕃茄肉，就甘食都已經好高分。牛柳粒圍住碟邊做裝飾，好有心思。一啖咬落去啲肉汁爆入口中，好幸福啊！

煙花女意大利面配牛柳粒 $75

Miss Coffee

地址：屯門青柏徑6號鹿苑地下18號舖
營業時間：10:30–22:30