趁住去深圳搵聖誕打卡熱點推薦比大家嘅時候,小編趁空檔去咗心心念念嘅熊本熊主題餐廳!令人驚訝嘅係除咗餐廳入面之外,熊本熊似乎霸佔埋成個商場,傻呆呆嘅樣令人溶化會心微笑!
一入到商場其實就見到熊本熊嘅紙版,入面係比小朋友玩嘅地方。再向前行少少就見到熊本熊啦!3隻熊本熊疊埋一齊好QQ啊,隔離仲有一隻玩緊飛行棋。熊本熊啊,你塊面向上點玩啊?
向餐廳行見到出面仲有一隻小熊本熊係度開心踩單車,門口仲有個打卡位比你同熊本熊排排座影相!
餐廳前面係Cafe同精品店,有超多熊本熊嘅精品,Fans一定係度荷包失守啊!
入到去裝修好明亮,木色嘅餐廳更突顯黑色嘅熊本熊呢!上至牆身,到座位上嘅公仔同座墊,下至餐具水杯全部都係可愛嘅熊本熊啊!真係一啲都唔馬虎架!
今次我地就試咗咖哩炸雞定食、煎餃子、宇治抹茶瓶子奶凍同美顏火龍果草莓酸奶。
咖哩炸雞定食超推薦!首先上菜見到飯上面嘅紫菜熊本熊已經加100分啦!估唔到味道都幾唔錯,炸雞唔會有雪藏味,放咗一段時間都唔會油,好好食!咖喱亦都好香,同日本食到嘅咖喱味道係一樣,真係好抵讚,定食仲會跟味噌湯同沙律,沙律都好新鮮,加酸甜嘅沙律醋好好味啊!
煎餃子建議趁熱食,我地因為掛住影相攤凍先食真係少少減分,但唔會有油溢味,想像到熱食應該真係好正!
宇治抹茶瓶子奶凍,本身第一啖覺得有少少苦,想放棄嘅時候見到奶凍湧上黑蜜!混合之後真係好好食!
美顏火龍果草莓酸奶,呢個係我唯一一樣覺得唔太推薦嘅單品,因為佢太杰身啦!不過火龍果同草莓都唔係甜度好高嘅水果,加埋酸奶其實唔會太甜,應該都冇另外添加糖,又真係幾美顏嘅!
熊本熊主題餐廳KUMACAFE(海雅繽紛城店)
地址:深圳建安一路99號海雅繽紛城L1002C
營業時間:星期一至四、星期日 10:00-22:00 星期五、六 10:00-22:30
電話:0755-33332693