日本清酒一向都深受香港人喜愛，但好多時都會比人一種有啲年紀嘅感覺，其實清酒都好受日本年輕一族歡迎，今次《Umai 嚐.日》副社長及總編輯陳銘基先生就為我地介紹日本清酒最新4大趨勢，包括氣泡清酒、低酒精清洒、原酒同古酒，各有特式，好值得大家嘗試！
#氣泡清酒
故名思義就係有氣泡嘅清酒（二氧化碳存於酒中），酒精濃度與一般清酒一樣或比較低，只適合冷飲，多數用葡萄酒杯或精酒杯飲用。
明石鯛純米吟釀有氣清酒
酒精濃度7%，比起一般清酒酒精濃度低，飲落好似香檳咁有好多氣泡，味道係酸甜嘅果香。特別嘅係入面其實仲會見到米嘅殘餘，係二次發酵清酒嘅特點。呢款氣泡清酒好清爽開胃，可以用作餐前酒，配以日本不同嘅料理。
#低酒精清酒
佢嘅特色係比一般清酒更甜，酒精濃度低，容易入口，比較適合年輕人或女士飲用。一般都會以凍飲為主，係近年年輕人之間大熱嘅一款清酒。
Te-hajime
Hajime係日文有開始嘅意思，都好岩入門人士飲用。佢酒精濃度8%，甜度高達-60度，聞落去係清爽嘅蘋果、梨香，飲用後果味留係口中，而且越飲越甜，同濃味或辛辣料理係非常好嘅搭配。
#原酒
完酒係無添加水嘅清酒，酒精濃度較高，辛烈感較強，比用家飲到最原汁原味嘅感覺。多數係日本嘅地方酒造會釀製，出口比較困難，係外國尤其珍貴。
原酒柏盛素顏
酒精濃度19%，聞落有果仁同果香混合嘅味道，入口比較厚身，初頭會飲到濃厚嘅果香，後期會有啲苦，係一款以傳統佐瀨式壓搾嘅原生酒，無經過過濾或加熱處理，搭配唔同口味嘅食物都可以。
#古酒
古酒係多年嘅釀造之後，會呈現較深嘅顏色，例如金黃色、琥珀色。酒精濃度一般較高，唔同嘅酒造釀出黎嘅古酒會有不一樣嘅風味，而且會以唔同嘅溫度飲用。
熟露枯 經典大吟釀10年
呢款古酒呈淡淡嘅米黃色，聞落會有類似香菇、米飯嘅鮮味，但入口卻係甘醇嘅甜，帶少少焗果仁嘅甜香，氣味同飲用味道係兩回㨻，非常特別。適合於用餐時飲用。
