本身今次小編係想同大家由火炭行去大埔，但由於雨後路滑，小編都係唔冒險行泥路，於是就睇住Google Map周圍走，誤打誤撞比小編發現呢個充滿花香嘅地方。

我地由火炭港鐵站D出口出發，一路沿大路行到尾轉左到桂地街花園，繼續向前行會見到一個地盤，地盤隔離有條樓梯上，一上去就會見到一排小屋，應該係比地盤工人休息嘅地方。

一路行都聽到流水聲，可惜一開始嘅路段睇得唔清楚，只係隱隱約約見到有D水沖落山。繼續向前行，會經過一條小編都唔知做咩嘅橋，下面明明有路，可能怕暴雨後太多水先起條橋以備不時之需啦！小編見到有個伯伯行咗入水抖涼，而行上橋就可以俯瞰2邊嘅流水，遠處就係火炭市區啦。

沿路繼續行，會見到一間小白屋，呢度有塊指路石標示往大埔，跟住指示上坡上樓梯，呢度都有幾多林蔭，夏天黎都唔怕曬，上完樓梯呢向旁邊望，藍天白雲綠樹林真係好靚，由於小編行左好多「怨枉路」先黎到呢度，坐咗係度抖下望咗一陣天空先走，對住咁藍嘅天體力都回復得快D。

然後就落樓梯，落到去向右轉，行一陣就見到往大埔嘅指示，但由於小編無著到防滑鞋，泥路濕滑，所以都唔冒險行上去啦。於是我地就繼續行平路，呢邊有好多好靚嘅蝴蝶，仲有藍蜻蜓，仲好好彩比我地見到蟹仔添!

行多10分鐘左右，經過2個小水源，就見到一片白花田，呢度有塊牌話塊田係私人物業，但小編望落就覺得似野花多D，一朵朵白色嘅花迎風飄香，空氣入面全部都係淡淡嘅花香，好舒服啊！再行落去就有欄杆欄住，所以我地就原路折返。

難易度：★★

要行少少樓梯，多數都係平路。

打卡度：★★★

有小溪、有蝴蝶，仲有好多唔同嘅花。

設施完善度：★★★

得入口有公廁，路面鋪得好好，不過指示就唔多。

呢度有唐狗出沒，不過應該係有人養嘅，怕狗嘅大家要留意。呢條路線唔算長，都無好開揚嘅風景，但見到淙淙流水野花處處，仲會見到好多小生物，大家去放鬆之餘記住要好好保護佢地，唔好亂拋垃圾啊！去郊外地方記住做足防蚊同防曬措施、要適時保充水份，咁先玩得盡興。今次郊遊習作係咁多，我地下次見啦，byebye！