曾經有人話說青衣係香港嘅美食沙漠，甚至同今日馬鞍山有得揮！今日一於同大家踩入青衣，睇下青衣到底有冇好嘢食喇。由於小編人生路不熟，唯有係青衣城「搵食」，行行就發現 The Story Cafe and Bakery，海洋風嘅裝修都幾雅致，而且價錢仲好驚喜，加上座位都好闊落，坐得幾舒服～岩曬同朋友仔食下飯，傾下計。

垂吊著的漁網跟小魚

今次小編就叫咗雞扒芝士鐵板焗飯套餐($58)、鐵板慢煮春雞仔 ($58)、鮮果叢林($62)

雞扒芝士鐵板焗飯套餐聞落去已經好香，入口味道唔會太濃，而且芝士味都好重，雞肉口感嫩滑軟稔！而且仲有薯仔同其他蔬菜做配菜，整體感覺都唔錯呢～亦唔洗擔心芝士會太膩。

鐵板慢煮春雞仔雖然係半隻，但依然好足料架！仲可以選擇黑椒汁或者蒜泥汁添～加上燒雞皮嘅脂肪唔多，而雞脾都好肉汁，配菜薯角亦卜卜脆。

食完主菜梗係要食返甜品喇，今次就揀左鮮果叢林，係綜合水果嘅班戟卷，入面仲有吉士、忌廉添，真係又滿足又邪惡！班戟外皮好煙韌，每件班戟卷都有兩種水果。

飲品方面就揀咗藍橘子柚子梳打($35)、香橙士多啤梨沙冰($38)，同第二款甜品藍蝶花荔枝慕絲($38)。

藍蝶花荔枝慕絲超好味！而且粉藍色好夢幻，賣相超可愛，下層荔枝清甜香軟，感覺清新加上口感夠滑，而且只係$38蚊絕對試得過。