今日窮人食家唔係同大家用50蚊搵食啦，而係黎到窮人聖地Food Court睇下有咩好食。今次我地就去咗旺角新開嘅商場T.O.P.，聽聞佢Food Court比朗豪坊少人，價錢都唔算貴，就等我地睇下係咪真！

T.O.P.嘅Food Court位於商場地下，有6間餐廳，間間都大有來頭，仲集合中西美日港泰美食，真係好吸引！

今次我地就試咗人氣最高嘅美式炸雞Popeyes，2件炸雞Set係$48，雞肉好大件，攝哥哥仲以為呢度有大半隻雞份量添！味道都好夠，不過大件嘅雞塊有D位略乾。薯條聞落係扭扭薯條、睇落係普通薯條，食落又幾好味，外皮炸得幾脆身。

2件炸雞Set $48.00

然後我地又試咗米芝蓮食府「鴻師傅」嘅叉燒皇煎蛋飯，係觀塘嘅總店「阿鴻小吃」連續5年獲得米芝蓮一星榮譽，每日少量店內即燒嘅叉燒皇係最大賣點！的確佢嘅肉味比普遍叉燒都重，肉質都好新鮮唔會有乾柴嘅感覺。不過調味就唔係好夠，小編當日都聽到有人要求要額外叉燒汁，應該大家都同小編有一樣感覺。

叉燒皇煎蛋飯　$58.00

其實小編月尾真係成日會去Food Court食飯，如果你地有好味Food Court推薦，記住inbox話比小編知啊！