係幾個月之前小編同大家分享過深圳灣口岸即日來回玩樂提案同深港拍拖好去處，唔知你地去咗未呢？但深圳咁大，又點會係一次兩次就去得晒架呢？今個月小編就為大家編定更多好玩路線，今次就由南山區開始。

南山區除咗小編之前介紹過嘅海岸城有Line Friends Cafe & Store同Bonbons Hello Kitty Cafe之外，仲有經常搞活動嘅歡樂海岸，之前就有搞過風靡深港兩地萬千仙女嘅Tean Lab同色廊展，今次呢條路線就想同大家再返去歡樂海岸，同埋去下華僑城創意園逛一逛。

去歡樂海岸最方便就係搭地鐵去深圳灣公園站，係E出口一出就到啦，非常方便，如果你係7月1號之前上去，仲趕得切去超夢幻嘅色廊展，恩恩同欣欣係度影咗幾個鐘相，15個場景15隻色任你玩！其實呢度不時都會舉行好多打卡展覽，記住留意我地Homita去睇最新消息啦！

歡樂海岸另一樣出名就係佢嘅美食，上次我地就同大家介紹咗Tony Flower，今次我地就去咗呢間台灣菜豆腐花城，老實講小編覺得有少少貴，不過因為當日太熱啦，只要有冷氣小編都殺入去。其實仲有好多好好食嘅選擇例如荃園、Lady7、Hello Kitty、陳鵬鵬、美奈小館等等，想知詳情可以點擊餐廳名睇更多資訊。

食完野就可以去歡樂海岸購物中心行下，小編推薦大家去潮玩俱樂部同西西弗書店，潮玩俱樂部有一片玻璃地板，地板入面放咗好多書同玩具，好特別啊！呢度主要都係賣精品為主，有興趣可以過黎睇下有咩特別嘢買返去，而西西弗書店其實係深圳有唔少分店，店鋪嘅裝修好有歐洲舊書店嘅味道，入面仲有矢量咖啡，比大家一路嘆咖啡一路享受閱讀嘅樂趣。

如果色廊展同歡樂海岸嘅人造景觀都仲未影爆大家嘅Memory，小編仲有一個地方比大家打卡影相，就係位於歡樂海岸購物中心二樓嘅海洋奇夢館，係網上買飛會平少少，佢最好拍嘅地方就係會變色嘅水母隧道，係度仲有唔同嘅海洋生物，不過就唔算大，所以買唔買飛入場就自己衡量一下啦。

Photo via instagram

係歡樂海岸玩咗半日，等晏就冇咁熱冇咁晒嘅時候就可以出發去附近嘅華僑城創意文化園，呢度有唔少打卡位，係週末嘅時候仲可能會舉行創意市集，可以買到唔少手工產品。而且呢度經常都會有唔少藝術展覽，有興趣嘅朋友就唔好錯過啦！

呢度有唔少戶外嘅藝術品，欣賞之餘又可以打下卡；因為呢度係由工業區改建，想影復古工業風嘅朋友就可以係度影返夠本。呢度有紅磚小道、拱形花門、貼滿Poster嘅打卡牆，一路行一路影影影，除此之外呢度都有唔少個性店鋪，除咗小編之前同大家推薦嘅舊天堂書店之外，鹿名花店、綻放花園、淺蔥小唱、523 COFFEE等等店鋪都非常有自己嘅個性。

不過恩恩同欣欣黎到深圳，就梗係要去少女心爆棚嘅地方打卡啦！Dreamiya可謂係深圳網紅店嘅一姐，由佢出面小小露台嘅白色搖椅，去到入面一排嘅大理石餐桌、粉灰色嘅座位同梳化、一隻隻粉色嘅毛公仔，成間鋪個額頭咪就戳住少女心三隻字。唔單止係裝修，連食物同飲品都係超！級！少！女！心！不過呢間Cafe係假日嘅時侯好多人架，價錢都唔算平，建議大家閒日先好過黎影相，店員會同你推薦適合你口味嘅蛋糕同飲料，但小編誠心同大家講，係度就以外表出發點餐啦，如果一心想黎食野可以參考返上面小編講嘅餐廳。

呢度夜晚都仲有唔少帶酒吧嘅餐廳，夜晚呢度嘅燈光亮起，別有一番情調喔，不過大家要留意返地鐵同關口嘅休息時間，不過就算玩得夜咗都可以搭的士經皇崗口岸返香港。

下次我地會同大家介紹埋寶安區同福田區嘅行程，記住留意Update啦:)