睇開犯罪動作片嘅話，就會發現呢類電影好多時都係以男士為主角或領頭者，好少機會見到一班女士犯罪。今個月我地就有風靡全球嘅《盜海豪情》回歸，並為我地帶嚟八位一律由女星扮演嘅犯罪集團成員，相信女士們睇嘅時候都會更加入戲。

《盜海豪情：8美千嬌》由《飢餓遊戲》導演加利羅斯(Gary Ross)執導及編劇，電影雲集兩大金像影后—《引力邊緣》珊迪娜布洛(Sandra Bullock)、《情迷藍茉莉》姬蒂白蘭芝(Cate Blanchett)，帶領《孤星淚》金像女星安夏菲慧(Anne Hathaway)、《玩轉腦朋友》文迪嘉蓮(Mindy Kaling)、《卡露的情人》莎拉寶森(Sarah Paulson)、《賤鄰2》艾桂菲娜(Awkwafina)、國際樂壇天后蕾哈娜(Rihanna)及《皇上無話兒》金像提名女星海倫娜寶咸卡達(Helena Bonham Carter)，配上《一切從音樂再開始》占士高登(James Corden)及《哈比人》系列李察亞密提治(Richard Armitage)聯合主演，淨係睇陣容都覺得夠哂強勁呀。

故事講述黛比奧申(珊迪娜布洛 飾)日復日咁樣計劃一場佢人生中最大嘅搶劫行動。Debbie知道要集結盜賊界最精英嘅團隊：佢嘅最佳拍檔露兒美娜 (姬蒂白蘭芝 飾)、珠寶匠艾美達(文迪嘉蓮 飾)、街頭騙子康堤絲(Awkwafina 飾)、贓物買賣專家譚美(莎拉寶森 飾)、黑客9號波(Rihanna 飾)同埋時裝設計師露絲韋伊(海倫娜寶咸卡達 飾)。今次嘅目標係價值1.5億美元嘅鑽石，呢啲鑽石將會掛係全球知名女星達芬妮古格(安夏菲慧 飾)嘅頸上。而佢，將會成為年度盛事 — 藝博晚宴嘅焦點。呢個計劃堅如磐石，但明顯地如果團隊要走係冰上並拿走冰塊嘅話，所有野都必須完美無缺……

同系列前作唔同，《盜海豪情：8美千嬌》從拉斯維加斯賭場移師到紐約，目標是全城焦點 – 係紐約大都會博物館舉行嘅藝博慈善晚宴 (The Met Gala)。製作團隊史無前例得到許可，得以係慈善晚宴拍攝咗10天。導演認為可以進入會場拍攝係電影成事嘅關鍵，亦為電影提供一大優勢。

被視為盜竊目標嘅頸鏈亦係片中嘅一大亮點，電影特地邀請咗卡地亞製作一條值得主角花上5年多時間計劃去盜取嘅頸鏈，而卡地亞就打造咗一條度身訂造版嘅杜桑頸鏈。呢款頸鏈係卡地亞系列其中一件最昂貴同大型嘅鑽飾，可見製作團隊為咗提高道具嘅像真度而下足本錢。今次團隊更有機會深入卡地亞嘅紐約旗艦店(Cartier Mansion )進行拍攝，所以出現係銀幕上嘅珠寶都係真嘅，絕對係大銀幕上難能可貴嘅一幕。

《盜海豪情：8美千嬌》由華納兄弟影片公司及Village Roadshow Pictures聯合呈獻，華納兄弟影片公司發行，並將會係6月14日於香港上映。呢部電影不但有盛大嘅陣容，亦有高質嘅取景同道具製作，相信呢部犯罪電影一定會為大家嘅夏日添上緊張刺激嘅色彩。