Homita - 郊遊習作 梧桐寨睇瀑布
#香港美食推薦
×
Quiz
Beauty
+
Body
+
Fun
+
Foodie
+
Me
Time
+
Shopaholic
+
Travel
+


  


郊遊習作 梧桐寨睇瀑布
郊 Landscape  |  by Y小編  |  2 years ago   

夏日炎炎,戶外活動好易中暑,所以今次我地想同大家去大帽山梧桐寨睇瀑布,路線唔算長,沿途有唔少林蔭,最主要係瀑布同瀑布之間嘅間距唔算長,每個瀑布都可以抖下涼,消下暑。梧桐寨瀑布被譽為「香港四大自然奇景」之一,共有四條主要瀑布,由下至上起為井底瀑、中瀑、主瀑及散髮瀑。今日我地就同大家行去頭三個瀑布,路程唔算長,但都要啲體力。

首先大家可以係搭64K巴士係梧桐寨落車,向車尾行幾步就會見到路口行入梧桐寨村。沿路經過公廁、涼亭,之後就會見到村屋。呢度已經見到好多指示牌,有政府整嘅,更加多係有心人嘅手筆。

好快我地就見到萬德苑牌扁,行多幾步就到萬德苑,旁邊有條小徑,行入去就見到地圖啦!由呢度開始我地就要不斷上落落,而且中途冇補給同洗手間,萬德苑有水同汽水賣,如果冇帶水記住買返枝啦!

開始上山嘅路其實唔算難行,都幾多林蔭,就算天氣熱啲都唔算好辛苦。大約20分鐘後我地就見到井底瀑嘅指示牌,大家記住要睇清楚指示牌,因為呢度係分經瀑布同唔經瀑布往大帽山,第一個分岔向下行就會見到井底瀑。

井底瀑係四條主要瀑布入面最細嘅一個,屬於二層瀑布,大約5米高。不過呢度環境清幽,三面都係樹,一束陽光經瀑布頂散落地面,好似仙俠電影場面。

行原路上去向中瀑前進,行10分鐘左右就到,呢度嘅水流比井底瀑大,係瀑布底有好多大石,坐係大石上休息都可以感覺到水氣撲係身上,非常解暑!老實講,如果平時冇行山習慣,其實黎到呢度Hea返一個下晝都唔錯,因為接落黎就係考驗體力嘅時候啦!

離開中瀑,開始我地嘅體力大挑戰,唔單止係因為要上上落落,更加因為呢度有唔少冇欄杆嘅樓梯,有時向上望都唔係好見到前路,石級時大時細,好考驗大家嘅腳骨力。行咗大約30分鐘左右就見到前方又有一個無指示嘅小瀑布,大家都可以前去休息。如果唔去小瀑布都可以再上,行多一陣就會見到香港最高嘅瀑布主瀑啦!

主瀑高達30米,又窄又長,鬼斧神工。不枉費大家身水身汗行上黎,涼風帶住水氣打在身上,抬頭就係傾瀉嘅瀑布,今次我地就以呢度為終點,休息一下就沿路折返。

其實係主瀑之上15分鐘嘅路程就係散髮瀑,上去嘅路段要上斜攀爬,散髮瀑比起前三個瀑布睇落更有仙氣,有一種柔美嘅感覺,大家有時間同體力都可以上去玩。

 

難易度:★★★

 

後段比較廢力,其餘都唔算難行,有好多地方可以抖涼休息。

 

打卡度:★★★★

 

香港四大自然奇景名不虛傳,有一種仙俠電影嘅感覺。

 

設施完善度:★★

 

起點洗手間,萬德苑有補及,行入去都有好多指示牌,只係路面比較崎嶇。

 

因為我地今次係原路走,所以你點樣上自己就會預計到你點樣落山,記住量力而行,最後提提大家行山要準備充足;最緊要係愛惜香港大自然,自己嘅垃圾自己帶走啊!今次嘅郊遊習作係咁多,我地下次見啦!ByeBye!

如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
Y小編

編輯

郊遊、影相、美食、旅遊、美妝、潮流、電影大包圍,要做個天天長知識嘅好學小姐。 有興趣報料可以Send email去 yan@homita.com.hk 我會發自內心感激您。
You May Also Like
This Week's Top Post
郊遊習作 隱世靚海灘白腊灣
Y小編 - 2 years ago
放風箏好去處 小編實測邊度最好放
Y小編 - 3 years ago
郊遊習作 趁著好天氣去大水管影靚相
Y小編 - 2 years ago
假日單車小出走 天水圍尖鼻咀秘景遊
Y小編 - 2 years ago
郊遊習作 龍鼓灘浪漫拍拖睇日落
Y小編 - 2 years ago
放假抒壓好去處 5條超輕鬆郊遊路線
Y小編 - 2 years ago