今日我地想同大家行衛奕信徑第一段,由赤柱行去陽明山莊。呢條路線大上大落,少啲體力都唔得啊!有做開運動嘅朋友不妨考慮挑戰一下!
大家可以係中環大會堂搭6號或6A號巴士,係衛奕信徑站落車。遠足徑第1段嘅起點就在巴士站執邊。呢度開始就已經係一大段長石級,一直上樓梯直至到達孖崗山。中途有一個觀景台,係度可以睇到赤柱同鶴咀半島。
之後繼續沿泥路上坡,到達孖崗山第一個山頂,呢段登山徑道其實唔算長,但好耗費體力,所以千祈唔好急住行完,到頂就休息一陣,欣賞一下得來不易嘅旖旎風光。之後沿泥路落坡,再登上孖崗山第二個山頂。孖崗山呢段路真係好考體力,除咗上上落落,泥路都係耗費力氣嘅一點,所以大家一定要做足準備先好挑戰。
孖崗山落山嘅路係一條陡斜兼大大級嘅樓梯,小編最怕落呢啲樓梯,比上山更攰,急降嘅梯級行到腳震震啊!堅持一陣就抵達淺水灣坳,落到去就係時候要上紫羅蘭山啦! 沿石級向上行,上攀往紫羅蘭山。紫羅蘭山同孖崗山需要上升嘅高度其實差唔多,真係體力嘅大考驗,如果真係想走可以係再上山前沿紫羅蘭山徑退出至黃泥涌水塘,千祈唔好太勉強自己啊!
上紫羅蘭山途中唔係好多林蔭,大家記住做好防曬同好好補足水份,行下抖下,去到最後會越行越好行,斜度放緩,呢度可以睇到大潭篤水塘同大潭中水塘,睇住景慢慢上到紫羅蘭山頂。係度可以見到港島西、港島北同九龍,最緊要係終點在望,係度就見到終點陽明山莊,最辛苦嘅已經過去啦!
係山頂分岔口右轉,依山徑下降,一路行至陽明山莊,結束衛奕信徑第一段行程。最後大家可以行落少少係黃泥涌峽道搭巴士離開。
難易度:★★★★
漁農自然護理署係郊野樂行表示呢條路線難度為極費力難行之山徑,有大量樓梯、斜坡要上,落山亦因為急降而增加難度,新手不適宜挑戰。
打卡度:★★★
孖崗山同紫羅蘭山係不同嘅季節都係賞花好去處,沿途可以遠眺港島及九龍。
設施完善度:★
中途只有一個洗手間,記住自己帶水同食物。
好啦小編要同大家坦白其實我係無參與今次郊遊,今次嘅行程係攝哥哥完成嘅(拍手),因為小編自問真係無力行曬全段,係度都希望大家係挑戰困難路線前要考慮清楚,要量力而行,香港仲有好多郊遊好去處,不妨先由簡單嘅路線開始挑戰:)最後提提大家行山要準備充足;最緊要係愛惜香港大自然,自己嘅垃圾自己帶走啊!今次嘅郊遊習作係咁多,我地下次見啦!Bye!